काठमाडौं– भोटेकोशी तथा त्रिशूली नदीमा आएको विनाशकारी बाढीपछि प्रभावित क्षेत्रमा नेपाली सेनासहितका सुरक्षा निकायले आज दिनभर खोज तथा उद्धारलाई निरन्तरता दिएका छन्। नेपाली सेनाले हवाई तथा जमिनी माध्यमबाट उद्धारसँगै जलविद्युत आयोजनाका टनेल, पावरहाउस तथा जोखिमयुक्त क्षेत्रमा बेपत्ताको खोजी गरेको छ।
नेपाली सेनाका अनुसार मंगलबार साँझ ७ बजेसम्म विभिन्न प्रभावित क्षेत्रबाट हवाई साधनमार्फत थप ८१ जनाको उद्धार गरिएको छ। योसँगै हालसम्म हवाई साधनबाट उद्धार हुनेको संख्या ४ हजार ८१ पुगेको छ। उद्धार गरिएकामध्ये ३ हजार ७९८ जना नेपाली र २८३ जना विदेशी रहेका छन्।
टनेलमा शव फेला
रसुवागढी जलविद्युत आयोजनाको रोङ्गास्थित केबल टनेलमा ड्रोन प्रयोग गरी खोजी गर्दा एक शव फेला परेको छ। नेपाली सेना, आयोजनाका प्रतिनिधि तथा Composite Quick Reaction Team सम्मिलित टोलीले टनेल क्षेत्रमा खोजी जारी राखेको छ।
लाङटाङ जलविद्युत आयोजनामा पनि संयुक्त उद्धार टोलीले खोज तथा उद्धारलाई निरन्तरता दिएको छ।
चिलिमेमा टनेलसम्म पुग्ने बाटो बनाउँदै खोजी
चिलिमे हाइड्रोमा विदेशीसहितको संयुक्त टोलीले ६/६ मिटर लम्बाइका चारवटा ठूला पाइप प्रयोग गरी हिँड्न मिल्ने बाटो तयार गरेको छ।
स्याफ्रुबेसीदेखि आयोजनाको टनेलसम्म भारी उपकरण लैजान सडकमा रहेको ठूलो ढुंगा ब्लास्टिङ गरी हटाइएको छ। Major Rock सम्म पुग्न अझै ९५ मिटर बाँकी रहेको सेनाले जनाएको छ।
Winch Machine र Bucket प्रयोग गरी Debris हटाउने काम भइरहेको छ। संयुक्त टोली टनेलभित्र करिब ११५ मिटर प्रवेश गरेर खोजी गर्दा हालसम्म केही फेला पारेको छैन।
माथिल्लो त्रिशूली–१ मा ४०० मिटरभित्र खोजी
माथिल्लो त्रिशूली–१ जलविद्युत आयोजनाको मुख्य प्रवेश टनेलमा विदेशीसहितको संयुक्त टोलीले करिब ४०० मिटरभित्र प्रवेश गरी खोजी गरिरहेको छ। त्यहाँ पनि हालसम्म केही फेला परेको छैन।
त्यस्तै, त्रिशूली–३ ‘ए’ को पावरहाउस तथा टनेलमा नेपाली सेनाका ३४ र सशस्त्र प्रहरी बलका चार जनासहित आयोजनाका प्रतिनिधिको संयुक्त टोलीले खोजी गरिरहेको छ।
त्रिशूली–३ ‘बी’ मा नेपाली सेनाका १०१ जना तथा आयोजनाका प्रतिनिधिहरूको टोलीले तीनवटा Excavator प्रयोग गरी आयोजनाको कार्यालय तथा आवासगृह क्षेत्रमा करिब २३ फिट गहिराइसम्म खनेर खोजी गरेको छ। हालसम्म केही फेला नपरे पनि खोजी जारी छ।
पुल निर्माण र मर्मत पनि तीव्र
बाढीबाट क्षतिग्रस्त पूर्वाधार पुनः सञ्चालनका लागि समेत नेपाली सेनाले काम अघि बढाएको छ। नुवाकोटको विदुर नगरपालिका–५, देवीघाटस्थित तादी नदीमा ५५ जना इन्जिनियरिङ फौज परिचालन गरी पुल निर्माणको काम तीव्र पारिएको छ।
बाढीबाट क्षतिग्रस्तमध्ये मर्मत गर्न सकिने पाँचवटा झोलुङ्गे पुलको मर्मत भइरहेको छ भने थप १५ वटा झोलुङ्गे पुल मर्मतको तयारी गरिएको छ। त्रिशूली बजार जोड्ने करिब २५० मिटर लामो झोलुङ्गे पुल निर्माणका लागि पनि काम सुरु गरिएको छ।
९ हजारभन्दा बढी सैनिक परिचालन
जमिनतर्फ पनि मैलुङदेखि स्याफ्रुबेसीसम्म पैदल गस्तीमार्फत खोज तथा उद्धार भइरहेको छ। त्रिशूली र धुन्चेमा नेपाली सेनाले स्थापना गरेका आपत्कालीन उपचार केन्द्र तथा मेडिकल पेट्रोलबाट हालसम्म ३ हजार ४८८ जनाले स्वास्थ्य सेवा प्राप्त गरेका छन्।
रसुवाको टिमुरेदेखि नुवाकोट, धादिङ, चितवन हुँदै नवलपरासी पूर्वसम्मका प्रभावित क्षेत्रमा नेपाली सेनाका ९ हजारभन्दा बढी फौज प्रत्यक्ष रूपमा परिचालन भएका छन्।
उनीहरूले बेपत्ताको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सञ्चालन र आपत्कालीन उपचारलगायतका काम गरिरहेका छन्।
बाढी प्रभावित क्षेत्रमा हवाई उद्धारसँगै जलविद्युत आयोजनाका टनेल तथा पावरहाउसमा बेपत्ताको खोजीलाई प्राथमिकता दिइएको छ। जोखिमपूर्ण संरचना र ठूलो मात्रामा थुप्रिएको Debris का कारण खोजी कार्य चुनौतीपूर्ण बने पनि सुरक्षा टोलीले विभिन्न उपकरण तथा प्रविधिको प्रयोग गरी खोजीलाई निरन्तरता दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
