काठमाडौं– नेपालमा आएको आकस्मिक बाढी र पहिरोमा परी ज्यान गुमाएका व्यक्तिको सम्मानमा यस साता हुने च्याम्पियन्स लिगका सबै १८ खेलअघि मौनधारण गरिने भएको छ।
युरोपेली फुटबलको सर्वोच्च निकाय यूईएफएले सोमबार विज्ञप्ति जारी गर्दै नेपालका बाढीपहिरो पीडितप्रति ऐक्यबद्धता र समर्थन जनाउन सबै च्याम्पियन्स लिग खेलअघि मौनधारणसँगै विशेष ब्यानर प्रदर्शन गरिने जनाएको हो।
खेलअघि प्रदर्शन गरिने ब्यानरमा ‘तिमी एक्लै छैनौं नेपाल’ लेखिएको हुनेछ। यूईएफएका अध्यक्ष अलेक्जान्डर चेफेरिनले विपत्तिबाट प्रभावित नेपालीप्रति सहानुभूति व्यक्त गर्दै उनीहरूलाई यस कठिन परिस्थितिबाट पुनः उठ्न शक्ति र धैर्य मिलोस् भन्ने कामना गरेका छन्।
यूईएफएले यसअघि पनि युरोपबाहिर भएका प्राकृतिक विपत्तिका पीडितप्रति सम्मान जनाउँदै आएको छ। सन् २०२३ को सेप्टेम्बरमा मोरक्कोमा गएको भूकम्प तथा लिबियामा आएको बाढीपछि पनि यूईएफएले खेलअघि मौनधारण गरेको थियो।
यस साताको च्याम्पियन्स लिग मंगलबार ६ खेलसँगै सुरु हुँदैछ। मंगलबार रियल मड्रिडले घरेलु मैदानमा इन्टर मिलानको सामना गर्नेछ। बुधबार र बिहीबार पनि समान ६–६ खेल हुनेछन्।
नेपालमा बाढीपहिरोका कारण ठूलो जनधनको क्षति भइरहेका बेला यूईएफएको यो कदमले नेपाली पीडितप्रति अन्तर्राष्ट्रिय फुटबल समुदायको ऐक्यबद्धता र सहानुभूति प्रकट गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788835940.webp)
-1786602170.png)
-1786513116.png)
-1788425345.png)
