काठमाडौं– लगातारको वर्षा, बाढी, पहिरो तथा सडक भासिनेलगायतका कारण देशका विभिन्न स्थानका राजमार्ग तथा सडकखण्डमा यातायात प्रभावित भएको छ। केही सडक पूर्ण रूपमा अवरुद्ध छन् भने केहीमा एक लेनबाट सवारी सञ्चालन भइरहेको छ।
प्रहरीले विभिन्न सडकखण्डको अवस्थाबारे जानकारी दिँदै वैकल्पिक मार्ग तथा सवारी सञ्चालनको समय तालिका सार्वजनिक गरेको छ।
काभ्रेपलाञ्चोक–सिन्धुली जोड्ने बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा गत भदौ १६ गतेदेखि बेलुका ७ बजेदेखि बिहान ५ बजेसम्म १० टनसम्मका मालबाहक तथा ढुवानीका साधन सञ्चालन हुनेछन्। निजी तथा सार्वजनिक यात्रुवाहक सवारी भने बिहान ४ बजेदेखि बेलुका ६ बजेसम्म सञ्चालन हुने प्रहरीले जनाएको छ।
मकवानपुरका विभिन्न राजमार्गमा पनि सवारी सञ्चालनका लागि छुट्टै व्यवस्था गरिएको छ। १० चक्कासम्मका मालबाहक तथा ठूला यात्रुबाहक सवारी त्रिभुवन राजपथ हुँदै काठमाडौं जाने र फर्किँदा कान्ति राजमार्ग प्रयोग गर्ने व्यवस्था मिलाइएको छ। कान्ति राजमार्ग हुँदै हेटौंडातर्फ आउने यात्रुवाहक सवारीले साँझ ६ बजेसम्म मकवानपुरको इलाका प्रहरी कार्यालय ठिङ्गन चेकपोस्ट पार गरिसक्नुपर्नेछ।
१४ सिटभन्दा कम क्षमताका साना यात्रुवाहक सवारी हेटौंडातर्फ आउँदा फर्पिङ–फाखेल–कुलेखानी हुँदै भीमफेदी र काठमाडौं जाँदा भीमफेदी–कुलेखानी–सिस्नेरी–दक्षिणकाली मार्ग प्रयोग गर्न सकिने प्रहरीले जनाएको छ। त्रिखण्डी नजिकको बेलीब्रिजको भारवहन क्षमता कमजोर रहेकाले इन्धन तथा भारी मालबाहक सवारीलाई उक्त पुल प्रयोग नगरी नजिकैको डाइभर्सन प्रयोग गर्न भनिएको छ।
विपद्जन्य अवस्था रहेकाले अत्यावश्यक अवस्थामा मात्र यात्रा गर्न, सवारी चालकले आफ्नो पालोमा अनुशासनपूर्वक सवारी चलाउन, ओभरटेक नगर्न तथा ट्राफिक व्यवस्थापनमा खटिएका सुरक्षाकर्मी र ट्राफिक प्रहरीको निर्देशन पूर्ण रूपमा पालना गर्न प्रहरीले आग्रह गरेको छ।
नुवाकोटको टोखा–छहरे सडकखण्डमा वर्षाका कारण अत्यावश्यक सेवाबाहेक अन्य सवारी साधनको रातिको आवतजावत रोकिएको छ। गत भदौ १ गतेदेखि अर्को सूचना जारी नभएसम्म राति १० बजेदेखि बिहान ५ बजेसम्म सार्वजनिक तथा निजी सवारी साधनको आवतजावत पूर्ण रूपमा बन्द गरिएको छ।
रसुवाको पासाङ ल्हामु राजमार्ग पनि पूर्ण रूपमा अवरुद्ध भएको छ। उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी सडकखण्डमा त्रिशूली नदीले सडकमुनिबाट कटान गरेपछि बाटो अवरुद्ध भएको थियो। त्यसपछि आएको बाढीका कारण सडकको अधिकांश भाग नष्ट भएको प्रहरीले जनाएको छ।
त्रिशूली बजार, बेत्रावती हुँदै रसुवागढी नाकासम्म जाने मुख्य राजमार्ग अवरुद्ध भएपछि स्याफ्रुबेँसीसम्म पुग्न काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे हुँदै स्याफ्रुबेँसी पुग्ने सिंगल लेनको कच्ची सडकलाई वैकल्पिक मार्गका रूपमा प्रयोग गर्न सकिने बताइएको छ।
धादिङमा पृथ्वी लोकमार्गका विभिन्न स्थानमा पनि यातायात प्रभावित भएको छ। बेनिघाट रोराङ गाउँपालिका–७ कृष्णभीरमा त्रिशूली नदीले सडक कटान गरी सडक भासिएपछि राजमार्ग पूर्ण रूपमा अवरुद्ध भएको थियो।
गजुरी गाउँपालिका–२ परेवा भीरमा सडकको तल्लो भाग भासिएपछि एक लेनबाट सवारी सञ्चालन भइरहेको छ। बेनिघाट रोराङ–१० ज्वाङखोलामा सडकमा चिरा परेपछि एक लेनबाट यातायात सञ्चालनमा छ।
गजुरी गाउँपालिका–२ चालिसेमा सडक माथिबाट सुक्खा पहिरो खसेपछि पृथ्वी लोकमार्ग पूर्ण रूपमा अवरुद्ध भएको प्रहरीले जनाएको छ।
मुगुको छायानाथ रारा नगरपालिका–४ ताल्चास्थित नाग्म–मुगु–गमगढी सडकखण्डमा अविरल वर्षाका कारण माथिबाट ढुंगा, माटो र लेदोसहितको पहिरो आएपछि सडक पूर्ण रूपमा अवरुद्ध भएको छ।
रोल्पाको परिवर्तन गाउँपालिका–३ भालखोरस्थित सहिद राजमार्गमा पनि अविरल वर्षाका कारण पहिरो खसेपछि सडक पूर्ण रूपमा अवरुद्ध भएको छ।
ललितपुरको बागमती गाउँपालिका–३ भट्टेडाँडा क्षेत्रमा अविरल वर्षाका कारण बाटो भासिएपछि कान्तिलोकपथ प्रभावित भएको छ। उक्त सडकखण्डमा एक लेनबाट सवारी सञ्चालन भइरहेको प्रहरीले जनाएको छ।
कालिकोटमा कर्णाली राजमार्गका दुई स्थानमा सडक अवरुद्ध भएको छ। शुभकालिका गाउँपालिका–१ गगने खोलामा सडक माथिबाट लेदोसहितको पहिरो आएपछि सडक अवरुद्ध भएको हो। खाँडाचक्र नगरपालिका–७ र ८ को सीमाना रातोपहाडमा करिब ५ देखि ७ मिटर सडक भासिएपछि पनि राजमार्ग अवरुद्ध भएको प्रहरीले जनाएको छ।
गुल्मीको कालीगण्डकी गाउँपालिका–२ राक्सेमा सडक माथिबाट लेदोसहितको पहिरो आएपछि कालीगण्डकी करिडोर पूर्ण रूपमा अवरुद्ध भएको छ।
सुर्खेतको बराहताल गाउँपालिका–७ औलिसेस्थित कर्णाली राजमार्गमा सडक माथिबाट पहिरो खसेपछि बाटो पूर्ण रूपमा अवरुद्ध भएको छ। सल्यानको कपुरकोट गाउँपालिका–४ आरिङ्गाले फेदीमा लेदोसहितको पहिरो जाँदा राप्ती राजमार्ग पनि पूर्ण रूपमा बन्द भएको प्रहरीले जनाएको छ।
यसैबीच, चितवनको नारायणगढ–मुग्लिन सडकखण्डमा पनि सवारी सञ्चालनमा आंशिक रोकावट हुने भएको छ। सोमबार बिहान ६ बजेदेखि अर्को सूचना जारी नभएसम्म तुइनखोला परियोजनाअन्तर्गत माटो कटान कार्यका कारण सवारी सञ्चालन प्रभावित हुने प्रहरीले जनाएको छ।
कृष्णभीर सडकखण्डको मर्मत कार्य सम्पन्न भई सवारी आवागमन सुचारु नभएसम्म प्रत्येक दिन बिहान ६ बजेदेखि ८ बजेसम्म सडक बन्द र ८ बजेदेखि ८:३० बजेसम्म सञ्चालन गरिनेछ। त्यसपछि पनि दुई घण्टा बन्द र ३० मिनेट खुल्ने क्रम जारी रहने भएकाले सोहीअनुसार यात्रा गर्न आग्रह गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781922122.jpg)
-1790561542.webp)
-1786602170.png)
