काठमाडौं– गणतन्त्र स्थापनापछि सरकारी कार्यालयका कार्यकक्षमा पूर्वराजाको तस्बिर राख्ने अभ्यास लगभग हराइसकेको अवस्थामा गृहमन्त्री सुधन गुरुङले आफ्नो कार्यकक्षमा पृथ्वीनारायण शाहको तस्बिर राखेका छन्।
गृहमन्त्री गुरुङको कार्यकक्षमा पूर्वराजा पृथ्वीनारायण शाहको तस्वीरसँगै जेन–जी आन्दोलनका क्रममा रगत लतपतिएको जुत्ताको तस्बिर पनि राखिएको छ। कार्यकक्षको अर्को भागमा भने राष्ट्रपति र प्रधानमन्त्रीको तस्वीर राखिएको छ।
गणतन्त्र स्थापना भएपछि पूर्वराजा तथा राजपरिवारसँग जोडिएका तस्बिर हटाउने र उनीहरूको नाममा रहेका विभिन्न संरचना तथा स्थानको नाम परिवर्तन गर्ने अभियान नै चलेको थियो। त्यसयता सरकारी कार्यालयका कार्यकक्षमा पूर्वराजाका तस्बिर देखिनु असामान्य मानिँदै आएको छ।
तर, अहिले गृहमन्त्री गुरुङको कार्यकक्षमा पृथ्वीनारायण शाहको तस्बिर राखिएपछि यो विषय चर्चामा आएको छ।
नेपाली सेनाले भने पृथ्वीनारायण शाहलाई ‘राष्ट्र निर्माता’ का रूपमा सम्मान गर्दै उनको तस्बिर राख्दै आएको छ। प्रधानसेनापतिको कार्यकक्षदेखि सेनाका विभिन्न अडिटोरियम हलसम्म पृथ्वीनारायण शाहको तस्बिर देखिन्छ।
अन्य सरकारी निकाय तथा संस्थामा भने यसरी पूर्वराजाको तस्बिर राखिएको थिएन । यतिबेला गृहमन्त्रीको कार्यकक्षमा भने उक्त तस्बिर देखिएको छ ।
गृहमन्त्रीको कार्यकक्षमा राखिएको पृथ्वीनारायण शाहको तस्बिर सुनसरीको कप्तानगञ्ज घटनाका विषयमा मन्त्रीको ध्यानाकर्षण गराउने क्रममा रास्वपाका नेता वीरेन्द्र केएमले खिचेर सामाजिक सञ्जाल फेसबुकमा सार्वजनिक गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
