काठमाडौं– शिक्षा तथा खेलकुदमन्त्री सस्मित पोखरेलले सबै विश्वविद्यालयअन्तर्गतका परीक्षा स्थगित गर्न सम्बन्धित विश्वविद्यालयका उपकुलपतिहरूलाई निर्देशन दिएका छन्।
विद्यमान विश्वविद्यालयसम्बन्धी ऐनले दिएको अधिकार प्रयोग गर्दै मन्त्री पोखरेलले प्राकृतिक विपद्का कारण विद्यार्थी, अभिभावक तथा आम नागरिकको जनजीवन प्रभावित भएको वर्तमान विषम परिस्थितिलाई मध्यनजर गर्दै भदौ १३ गतेदेखि सञ्चालन हुने सबै परीक्षा स्थगित गर्न निर्देशन दिएका हुन्।
साथै, भदौ १२ गते निर्धारित परीक्षामा विभिन्न कारणले सहभागी हुन नसकेका परीक्षार्थीका लागि उपयुक्त समयमा पुनः परीक्षा सञ्चालनको व्यवस्था मिलाउन पनि उनले निर्देशन दिएका छन्।
मन्त्री पोखरेलले विश्वविद्यालयहरूलाई स्थगित परीक्षाको संशोधित तालिका उपयुक्त समयमा सार्वजनिक गर्न तथा अत्यावश्यकबाहेकका भेला, गोष्ठी, सेमिनार, सभा लगायतका सामूहिक कार्यक्रमसमेत स्थगित गर्न अनुरोध गरेका छन्।
त्यस्तै, विपद्बाट प्रभावित विद्यार्थी तथा अभिभावकसँग विश्वविद्यालय र सम्बन्धित शैक्षिक संस्थामार्फत निरन्तर सम्पर्क र समन्वय गरी आवश्यक सहयोग तथा सहजीकरण गर्न निर्देशन दिइएको छ। प्रभावित विद्यार्थी तथा आवश्यकताअनुसार अभिभावकका लागि मनोसामाजिक परामर्शको व्यवस्था गर्नसमेत आग्रह गरिएको छ।
विपद्का कारण विद्यार्थीको अध्ययनमा परेको असरलाई ध्यानमा राख्दै उनीहरूको शैक्षिक निरन्तरता कायम राख्न आवश्यक व्यवस्था मिलाउन पनि विश्वविद्यालयहरूलाई भनिएको छ।
मन्त्री पोखरेलले वर्तमान संवेदनशील परिस्थितिलाई ध्यानमा राखी निर्देशनमा उल्लेख गरिएका व्यवस्थाहरू तत्काल कार्यान्वयन गर्न आवश्यक निर्णय लिन विश्वविद्यालयका उपकुलपतिहरूलाई आग्रह गरेका छन्।
विपद्को कठिन परिस्थितिमा विश्वविद्यालय परिवारका विद्यार्थी, अभिभावक, शिक्षक तथा कर्मचारीको सुरक्षा र हितलाई सर्वोच्च प्राथमिकतामा राखी आवश्यक निर्णय लिनसमेत उनले अनुरोध गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798392.jpg)
-1786602170.png)
-1786513116.png)
