काठमाडौं– रसुवाको भोटेकोशी नदीमा बुधबार बिहान आएको बाढीमा परी घाइते भएका २५ जनाको काठमाडौँका विभिन्न अस्पतालमा उपचार भइरहेको छ ।
नेपाल प्रहरीका प्रवक्ता एवम् प्रहरी उपरीक्षक दानबहादुर थापाका अनुसार घाइतेमध्ये चार जनाको राष्ट्रिय ट्रमा सेन्टरमा उपचार भइरहेको छ । ट्रमा सेन्टरमा नुवाकोटको विदुर नगरपालिका–५ का भक्त भण्डारी, सीता भण्डारी, विवेक कुमाल र रिहाना लामिछाने उपचाररत छन् ।
त्यस्तै, रसुवाको गोसाइँकुण्डका दावा डोल्माको वीरेन्द्र सैनिक अस्पताल, छाउनीमा उपचार भइरहेको प्रहरीले जनाएको छ ।
महाराजगञ्जस्थित त्रिभुवन विश्वविद्यालय शिक्षण अस्पतालमा भने बाढीमा परी घाइते भएका अधिकांशको उपचार भइरहेको छ । प्रहरीका अनुसार त्यहाँ नुवाकोट विदुर नगरपालिका–३ का तेजबहादुर तामाङ, रसुवा गोसाइँकुण्ड–५ का पेम्वा तामाङ, ठेगाना नखुलेका कुशल मगर, कार्की थरका एक पुरुष र नामथर खुल्न नसकेका अर्का एक पुरुष उपचाररत छन् ।
यस्तै, सिन्धुपाल्चोकका मीनबहादुर श्रेष्ठ, सल्यानका गिरीलाल बुढाथोकी, सिन्धुपाल्चोक बाह्रबिसे–५ का रुपक रोका, सुजन बस्नेत, अशोक श्रेष्ठ र सुशान्त श्रेष्ठ तथा जाजरकोटका बलबहादुर घर्ती मगरको पनि शिक्षण अस्पतालमै उपचार भइरहेको छ ।
गोरखाको टिमुरे, गोसाइँकुण्ड–७ का कामु नगरकोटीको समेत सोही अस्पतालमा उपचार भइरहेको प्रहरीले जनाएको छ । नगरकोटीसँग तीन महिनाको नाबालक शिशुसमेत रहेको बताइएको छ ।
यसैगरी टिमुरे, गोसाइँकुण्ड–७ का प्रेमदोर्जे घले, नेमा दोर्जे घले, ठेगाना नखुलेका फुर्प लामा, बर्दियाको जीतपुरका रामप्रसाद थारु, रसुवाको बेत्रावती गाउँपालिका–५ का सुराची राना मगर र भक्तपुरको चाँगुनारायण नगरपालिका–१ की रिता दोचाको पनि शिक्षण अस्पतालमा उपचार भइरहेको प्रहरीले जनाएको छ ।
भोटेकोशी नदीमा बिहान आएको बाढीले रसुवाको टिमुरे तथा आसपासका क्षेत्रमा ठूलो क्षति पुर्याएको छ । बाढीपछि घाइते भएकाहरूलाई उद्धार गरी उपचारका लागि काठमाडौँ ल्याइएको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
