काठमाडौं– दिल्लीमा स्वाइन फ्लूका संक्रमितको संख्या लगातार बढिरहेको छ। दिल्लीमा एच१एन१ अर्थात् स्वाइन फ्लूका बिरामीको संख्या बढेर २ हजार ३०८ पुगेको छ भने इन्फ्लुएन्जा ‘ए’ र ‘बी’का करिब ३ हजार केस पुष्टि भएका छन्।
यता, गौतमबुद्ध नगर जिल्लामा मंगलबार मात्रै स्वाइन फ्लूका १०५ नयाँ संक्रमित भेटिएपछि स्वास्थ्य क्षेत्रमा चिन्ता बढेको छ। जिल्लामा २४ घण्टामै संक्रमितको संख्या आठ गुणाले बढेको हो। सोमबारसम्म जिल्लामा १५ जना संक्रमित रहेकामा मंगलबार संख्या बढेर १२० पुगेको छ।
स्वास्थ्यसम्बन्धी अवस्थालाई ध्यानमा राख्दै दिल्लीका सबै अस्पताललाई सतर्क अवस्थामा राखिएको छ। स्वास्थ्य मन्त्री डा. पंकजकुमार सिंहका अनुसार यस वर्ष एच१एन१ प्रमुख सबटाइपका रूपमा देखिएको छ भने गत वर्ष एच३एन२ बढी देखिएको थियो।
दिल्लीमा डेंगुका ५७० र मलेरियाका २१५ संक्रमितसमेत भेटिएका छन्। यद्यपि, यस वर्ष डेंगु र मलेरियाका कारण अहिलेसम्म कुनै मृत्यु नभएको बताइएको छ।
स्वास्थ्य मन्त्री सिंहले अस्पताललाई अलर्ट राखिएको जानकारी दिएका छन्। ‘तयारी कागज र रिपोर्टमा मात्र सीमित नभई यसको प्रभाव प्रत्यक्ष रूपमा देखिनुपर्छ। केन्द्र सरकारले समेत आवश्यक सहयोग गर्ने आश्वासन दिएको छ। सम्बन्धित अस्पताल तथा विभागहरूलाई स्वास्थ्यसम्बन्धी एडभाइजरी पठाइसकिएको छ,’ उनले भने।
नोएडामा एकै दिन १०५ नयाँ संक्रमित
गौतमबुद्ध नगरका मुख्य चिकित्सा अधिकारी डा. मदन मोहनमणि त्रिपाठीका अनुसार मंगलबार भेटिएका सबै नयाँ संक्रमितको परीक्षण निजी अस्पतालमा गरिएको हो। जिल्लामा स्वाइन फ्लू परीक्षणका लागि छुट्टै प्रयोगशाला नभएकाले नमुना परीक्षण पीजीआईमा समेत गरिँदै आएको छ।
जिल्ला अस्पतालमा बिरामीको चाप बढ्दै गएको स्वास्थ्य विभागले जनाएको छ। परीक्षण महँगो भएकाले स्वाइन फ्लूको आशंका भएका सबै बिरामीको परीक्षण हुन नसकेको विभागको भनाइ छ। यस कारण वास्तविक संक्रमितको संख्या सरकारी तथ्यांकभन्दा फरक हुन सक्ने सम्भावना पनि रहेको बताइएको छ।
स्वास्थ्य विभागले स्वाइन फ्लूका लक्षण देखिएमा बेवास्ता नगरी चिकित्सकसँग परामर्श लिन सर्वसाधारणलाई आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
