काठमाडौं– हिन्दू भएकै कारण आफ्नो थाथथलोबाट लखेटिएर आफ्नै देशभित्र विस्थापित जीवन बिताइरहेका कश्मीरी पण्डितहरूलाई लक्षित गर्दै फेरि धम्कीपूर्ण सन्देश सार्वजनिक भएको छ। पछिल्लो १५ दिनमा दोस्रोपटक सामाजिक सञ्जालमार्फत यस्तो धम्कीपत्र सार्वजनिक भएपछि सुरक्षा निकायले घटनाको अनुसन्धान थालेका छन्।
सामाजिक सञ्जालका विभिन्न प्लेटफर्ममा ‘युनाइटेड लिबरेसन काउन्सिल (ULC)’ नामबाट जारी भएको भनिएको धम्कीपत्र भाइरल भइरहेको छ। पत्रमा केही कश्मीरी पण्डित परिवारको नाम तथा व्यक्तिगत विवरणसमेत उल्लेख गरिएको बताइएको छ।
आइतबार २३ अगस्ट २०२६ को मिति उल्लेख गरिएको भनिएको पत्रमा विस्थापित कश्मीरी पण्डितहरूलाई आफूहरूले निगरानी गरिरहेको चेतावनी दिइएको छ। उनीहरूमाथि राजनीतिक गतिविधिमा संलग्न भएको आरोप लगाउँदै धम्कीपूर्ण भाषा प्रयोग गरिएको छ। तर, उक्त पत्रको आधिकारिकता भने अहिलेसम्म पुष्टि भएको छैन। सुरक्षा निकायहरूले पत्र वास्तविक हो वा कसैले आतंक सिर्जना गर्ने उद्देश्यले नक्कली रूपमा तयार गरेको हो भन्ने विषयमा अनुसन्धान गरिरहेका छन्।
जम्मु–कश्मीरका मुख्यमन्त्री उमर अब्दुल्लाले कश्मीरी पण्डितलाई आएको धम्कीलाई गम्भीर रूपमा लिनुपर्ने बताएका छन्। उनले धम्कीको स्रोत पहिचान गर्न प्रहरी तथा सुरक्षा निकायलाई अनुसन्धान गर्न आग्रह गरेका छन्। विशेषगरी कश्मीरी पण्डित कर्मचारीको सुरक्षालाई प्राथमिकतामा राख्नुपर्ने उनको भनाइ छ। अब्दुल्लाले यसअघि पनि यस्तै परिस्थितिमा कश्मीरी पण्डित कर्मचारीहरूलाई निशाना बनाइएको स्मरण गर्दै पछिल्लो धम्कीलाई बेवास्ता गर्न नहुने बताएका छन्।
ULC बारे पनि अनुसन्धान
यसअघि पनि ULC को नामबाट यस्तै धम्कीपूर्ण सामग्री सार्वजनिक भएको थियो। भारतीय सुरक्षा तथा खुफिया निकायहरूले उक्त समूहलाई पाकिस्तानमा सक्रिय लस्कर–ए–तैयबासँग सम्बन्धित ‘फ्रन्ट’ संगठन हुन सक्ने आशंका गर्दै आएको विवरण भारतीय सञ्चारमाध्यमहरूले सार्वजनिक गरेका छन्। यसको स्वतन्त्र आधिकारिक पुष्टि भने भएको छैन। यसअघि अगस्ट ७ मा सार्वजनिक भएको भनिएको धम्कीपत्रमा केही कश्मीरी पण्डित सरकारी कर्मचारीको व्यक्तिगत विवरणसमेत राखिएको दाबी गरिएको थियो।
कश्मीरी पण्डितसँग सम्बन्धित संगठनहरूले पछिल्ला धम्कीलाई गम्भीर सुरक्षा चुनौतीका रूपमा लिँदै घटनाको गहिरो अनुसन्धान गर्न माग गरेका छन्। उनीहरूले धम्कीमा उल्लेख गरिएका व्यक्तिको जोखिम मूल्यांकन गरी आवश्यक सुरक्षा व्यवस्था मिलाउन सरकारसँग आग्रह गरेका छन्। नेसनल कन्फरेन्सका नेता फारुक अब्दुल्लाले समेत धम्कीपत्रको सत्यता र स्रोतबारे अनुसन्धान गर्नुपर्ने बताएका छन्।
सुरक्षा निकायले धम्कीपूर्ण सामग्री फैलाउने सामाजिक सञ्जालका केही च्यानल ब्लक गरेको बताइएको छ। पत्र कहाँबाट आएको हो र यसको पछाडि को संलग्न छ भन्नेबारे अनुसन्धान जारी रहेको भारतीय सञ्चारमाध्यमहरूले जनाएका छन्। कश्मीरी पण्डितको पुनःस्थापना तथा पुनर्वासका लागि सरकारी प्रयास भइरहेका बेला आएको पछिल्लो धम्कीले सुरक्षा चिन्ता थप बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789375192.jpeg)
-1786602170.png)
