काठमाडौँ – परराष्ट्र मन्त्री शिशिर खनाल असंलग्न आन्दोलनको उच्चस्तरीय स्मरण सभामा सहभागी हुन आगामी १४ भदौमा सर्बिया प्रस्थान गर्ने भएका छन्।
सर्बियाको राजधानी बेलग्रेडमा १५ र १६ भदौमा आयोजना हुने उच्चस्तरीय कार्यक्रममा नेपालका तर्फबाट मन्त्री खनालको नेतृत्वमा तीन सदस्यीय प्रतिनिधिमण्डल सहभागी हुनेछ। उक्त कार्यक्रममा सहभागी हुने निर्णय सरकारले गत २६ साउनमा गरेको थियो।
सन् १९६१ मा असंलग्न आन्दोलनको पहिलो शिखर सम्मेलन बेलग्रेडमै आयोजना भएको थियो। पहिलो सम्मेलनको ६५ वर्ष पूरा भएको अवसरमा यस वर्ष सोही सहरमा उच्चस्तरीय स्मरण सभा आयोजना गर्न लागिएको हो।
स्मरण सभामा विभिन्न मुलुकका राष्ट्र तथा सरकारका प्रमुख, उच्चस्तरीय प्रतिनिधिमण्डल र असंलग्न आन्दोलनमा आबद्ध देशका प्रतिनिधिहरू सहभागी हुने अपेक्षा गरिएको छ।
नेपालले लामो समयदेखि आफ्नो परराष्ट्र नीतिको महत्वपूर्ण आधारका रूपमा असंलग्नताको सिद्धान्तलाई अंगीकार गर्दै आएको छ। त्यसैले बेलग्रेडमा हुने स्मरण सभामा नेपालको सहभागितालाई आफ्नो परराष्ट्र नीतिसँग सम्बन्धित विषयका रूपमा हेरिएको छ।
मन्त्री खनाल १७ भदौमा सर्बियाबाट नेपाल फर्कने कार्यक्रम रहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
