पर्सा– अनलाइन सपिङ प्लेटफर्म ‘दराज’को होलोग्राम टाँसिएका ठूलो परिमाणका कस्मेटिक सामान आवश्यक भन्सार कागजातबिनै ओसारपसार भइरहेको अवस्थामा प्रहरीले नियन्त्रणमा लिएको छ।
जिल्ला प्रहरी कार्यालय पर्साका अनुसार वीरगञ्ज महानगरपालिका–१५ स्थित प्रतिमा चोकबाट विशेष सूचनाका आधारमा खटिएको प्रहरी टोलीले पिकअप गाडी चेकजाँच गर्दा विभिन्न ब्रान्डका कस्मेटिक सामान फेला पारेको हो।
प्रहरीका अनुसार बरामद सामानमा ‘दराज अनलाइन सपिङ’को होलोग्राम टाँसिएको थियो। तर, सामानसँग सम्बन्धित आवश्यक कागजात तथा प्रज्ञापनपत्र भने फेला नपरेको प्रहरीले जनाएको छ।
प्रहरीले बागमती प्रदेश ०१–०३४ च ६९२८ नम्बरको टाटा योद्धा पिकअपबाट मामा अर्थ फेसवास, मुचस्टाक ओसन फेसवास, नियासिनामाइड डेली फेस सिरम, मामा अर्थ ब्राइट सनस्क्रिन, केमिस्ट एट प्ले, मामा अर्थ बेबी, स्याडो, डबल ट्रबल, हाइब्रिड सनस्क्रिन, लिप स्टे, ब्राइट एन्ड इभेन क्रिम, मेलो, मिनिमलिस्ट सिरम, डर्मा र पिलग्रिमलगायतका कस्मेटिक सामान बरामद गरेको हो।
सामानसहित प्रहरीले सिराहाको घनगढीमाई नगरपालिका–९ का ५० वर्षीय श्यामबहादुर स्याङ्तानलाई नियन्त्रणमा लिएको छ।
प्रहरीले बरामद सामानको अनुमानित मूल्य करिब ९५ लाख रुपैयाँ रहेको जनाएको छ। सामान र पिकअपसहित नियन्त्रणमा लिइएका स्याङ्तानलाई थप अनुसन्धान तथा आवश्यक कारबाहीका लागि वीरगञ्ज भन्सार कार्यालयमा बुझाइएको छ।
दराजको होलोग्राम टाँसिएको भए पनि आवश्यक भन्सार कागजात र प्रज्ञापनपत्र नहुनुले सामानको आयात तथा ओसारपसारको प्रक्रियामाथि प्रश्न उठेको छ। घटनाबारे थप अनुसन्धान भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
