काठमाडौं – नेपाली कांग्रेसका दिवंगत नेता तथा राजनीतिक चिन्तक प्रदीप गिरिको चौथो स्मृति दिवसका अवसरमा शनिबार ‘HE TOLD US’ कार्यक्रम आयोजना हुने भएको छ।
लोकतान्त्रिक आन्दोलन, सामाजिक न्याय, वैचारिक राजनीति तथा सार्वजनिक जीवनमा गिरिले पुर्याएको योगदानको स्मरण गर्दै प्रदीप गिरि इन्स्टिच्युट र ग्रीन टेबलको संयोजनमा कार्यक्रम आयोजना हुन लागेको हो।
शनिबार अपराह्न १२ः०५ बजेदेखि नेपाली कांग्रेस केन्द्रीय कार्यालय, सानेपा, ललितपुरमा हुने कार्यक्रममा कांग्रेस सभापति गगनकुमार थापा, उपसभापति विश्वप्रकाश शर्मालगायत सहभागी हुने आयोजकले जनाएको छ।
आयोजकका अनुसार गिरिले जीवनभर उठाएका विचार, प्रश्न, मूल्य र राजनीतिक आदर्श आजको नेपाली समाजमा झनै सान्दर्भिक बन्दै गएका छन्। सत्ता र पदको मोहभन्दा माथि उठेर वैचारिक निष्ठा, सार्वजनिक संवाद र राजनीतिक इमानदारीलाई प्राथमिकता दिएका गिरिको विचारलाई औपचारिक श्रद्धाञ्जलीमा मात्र सीमित नगरी वर्तमान राजनीतिक तथा सामाजिक चुनौतीसँग जोडेर बहस गर्ने उद्देश्यले कार्यक्रम आयोजना गर्न लागिएको हो।
कार्यक्रम चार प्रमुख खण्डमा सञ्चालन हुनेछ। पहिलो चरणमा ‘प्रदीप : यादहरू’ शीर्षकमा गिरिलाई नजिकबाट चिन्ने, उहाँसँग काम गर्ने, यात्रा गर्ने तथा मतभेद राख्ने व्यक्तिहरूले आफ्ना अनुभव र स्मृति साझा गर्नेछन्।
त्यसपछि ‘विश्वास बिथोलिएको समाज : प्रदीप गिरि र सत्योत्तर गणतन्त्र’ शीर्षकमा पहिलो परिचर्चा हुनेछ। दोस्रो परिचर्चा ‘तपाईंलाई विरासतमा प्राप्त गणतन्त्र’ शीर्षकमा आयोजना गरिनेछ।
कार्यक्रमको अन्तिम चरणमा कविता, गजल तथा शायरीमार्फत गिरिको साहित्यिक र मानवीय पक्षको स्मरण गरिने आयोजकले जनाएको छ।
आयोजकले गिरिको स्मृतिलाई केवल औपचारिक श्रद्धाञ्जलीमा सीमित नराखी उनले उठाएका प्रश्न, विचार र राजनीतिक मूल्यलाई वर्तमान पुस्ताले पुनः बहसमा ल्याउनुपर्ने आवश्यकता रहेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
