काठमाडौं– काठमाडौंमा आयोजित एक विशेष समारोहका बीच नेपाली कांग्रेसका नेता धर्म गौतमको राजनीतिक संस्मरण ‘बीपी र विद्रोहका ती दिन’ लोकार्पण गरिएको छ।
नेपाली कांग्रेसका सभापति गगन थापा लगायतका अतिथिहरूले संयुक्त रूपमा विमोचन गरेको उक्त पुस्तकमा गौतमले बीपी कोइरालासँगको सानिध्य, तत्कालीन विद्रोहका दिनहरू र आफ्नो राजनीतिक यात्राका प्रत्यक्ष अनुभवहरू समेटेका छन्।
कार्यक्रमका प्रमुख अतिथि सभापति गगन थापाले आजको नयाँ पुस्ताले इतिहास बुझ्नका लागि यो पुस्तक पढ्नैपर्ने आधिकारिक कृति भएको बताए। बीपीका बारेमा अझै धेरै तथ्यहरू बाहिर आउनुपर्नेमा जोड दिँदै थापाले बीपीसँग संगत गरेका व्यक्तिहरूले नसकेमा अन्य मानिसहरूले उनका बारेमा अनर्गल कुरा बोल्ने खतरा रहने उल्लेख गरे।
त्यस्तै, लेखक तथा पत्रकार हरिहर विरही र समीक्षक सुचेता प्याकुरेलले गौतमले सशस्त्र आन्दोलनका क्रममा फार्बिसगञ्ज र पूर्णिया क्षेत्रको कमान्ड सम्हालेको स्मरण गर्दै पुस्तकमा बीपीको विचार, राष्ट्रिय मेलमिलापको नीति तथा डा. तुलसी गिरी र विश्वबन्धु थापाबाट भएका घटनाक्रमहरू समेत रोचक ढङ्गले प्रस्तुत गरिएको चर्चा गरे।
‘जेनजी’ आन्दोलनपछि पुस्तक लेख्ने प्रेरणा पाएको बताउने कृतिकार धर्म गौतमले पुस्तकबाट प्राप्त हुने रोयल्टीमा थप रकम मिसाएर आफ्नै गाउँको शिक्षा र स्वास्थ्य क्षेत्रमा खर्च गर्ने घोषणा गरेका छन्। किताब पब्लिशर्सले बजारमा ल्याएको यो कृति नेपाली राजनीतिक इतिहास अध्ययनका लागि एक महत्त्वपूर्ण दस्तावेज हुने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
