काठमाडौं– उपसभामुख रुविकुमारी ठाकुरको तर्फबाट उनकी दिदीमार्फत जनआस्थाका सम्पादक तथा आस्था मिडिया प्रालिका सञ्चालक किशोर श्रेष्ठविरुद्ध प्रहरी परिसर ललितपुरमा सोमबार उजुरी दर्ता गरिएको छ । उक्त उजुरीमा विभिन्न तस्बिर, सामाजिक सञ्जालका सामग्री र त्यसको प्रकाशनलाई आधार बनाइएको छ ।
उजुरीमा श्रेष्ठले प्रकाशित गरेको समाचार तथा तस्बिरले आफ्नो व्यक्तिगत गोपनीयता, चरित्र तथा सामाजिक प्रतिष्ठामा गम्भीर असर परेको दाबी गरिएको छ । उजुरीसँगै घटनासँग सम्बन्धित तस्बिर र सामाजिक सञ्जालका स्क्रिनसटलाई प्रमाणका रूपमा पेश गरिएको उल्लेख छ । प्रहरी परिसर ललितपुरका सूचना अधिकारी एसपी गौतम मिश्रका अनुसार ठाकुरले आफ्नी दिदीमार्फत् सोमबार दिउँसो उजुरी दिएकी हुन् ।
उजुरीमा मुख्य रूपमा तीनवटा तस्बिरलाई विवादको विषय बनाइएको छ ।
उजुरीअनुसार पहिलो तस्बिरमा उजुरीकर्ताको एकल व्यक्तिगत तस्बिर प्रयोग गरिएको बताइएको छ । दोस्रो तस्बिरमा उपसभामुख ठाकुरसँगै अन्य व्यक्तिहरूसमेत देखिने सामूहिक तस्बिर रहेको र उक्त तस्बिरबाट आफ्नो वास्तविक अवस्थालाई फरक ढंगले प्रस्तुत गरिएको दाबी छ ।
त्यस्तै, तेस्रो तस्बिरमा उपसभामुख ठाकुर अगाडि बसिरहेको देखिने र पछाडिको भागमा अन्य व्यक्ति समेत देखिने तस्बिर प्रयोग गरिएको उल्लेख छ । उजुरीमा उक्त मूल तस्बिरलाई काटछाँट गरी फरक सन्दर्भमा प्रस्तुत गरिएको दाबी गरिएको छ ।
‘फोटो काटछाँट गरेर चरित्रहत्या गर्ने प्रयास’
उपसभामुखले दिएको उजुरीमा तस्बिरलाई सामाजिक सञ्जाल तथा सञ्चारमाध्यममा प्रकाशित गर्दा त्यसको सन्दर्भसमेत परिवर्तन गरिएको दाबी छ । तस्बिरसँग जोडेर प्रयोग गरिएका शब्द तथा अभिव्यक्तिले आफ्नो चरित्रमाथि प्रश्न उठाउने र सामाजिक प्रतिष्ठामा गम्भीर असर पार्ने प्रयास भएको ठाकुरले उजुरीमा उल्लेख गरेकी छन् ।
उजुरीमा आफू सार्वजनिक जिम्मेवारीमा रहेको व्यक्ति भएकाले यस प्रकारका सामग्रीले व्यक्तिगत रूपमा मात्रै नभई सार्वजनिक तथा राजनीतिक जीवनमै असर पार्ने दाबी उनको छ । उजुरीमा भनिएको छ, ‘मलाई लक्षित गरी प्रयोग गरिएको भाषाले सामाजिक प्रतिष्ठामा गम्भीर असर पुर्याउने, मानसिक तनाव दिने र सार्वजनिक जीवनमा समेत नकारात्मक प्रभाव पार्ने अवस्था सिर्जना गरिएको छ ।’
फेसबुक पोस्ट र अनलाइन सामग्री पनि प्रमाण
उजुरीसँगै सामाजिक सञ्जालमा प्रकाशित सामग्रीका स्क्रिनसट पनि प्रमाणका रूपमा राखिएको छ । उजुरीमा विपक्षीको आधिकारिक फेसबुक पेज तथा अनलाइन सञ्चारमाध्यममा प्रकाशित सामग्रीलाई घटनासँग सम्बन्धित प्रमाणका रूपमा प्रस्तुत गरिएको छ ।
त्यसैगरी, आफू र सम्बन्धित व्यक्तिसँग खिचिएका विभिन्न तस्बिरलाई समेत प्रमाणका रूपमा समावेश गरिएको छ । उजुरीमा एकातर्फ मूल तस्बिर र अर्कोतर्फ त्यसलाई काटछाँट तथा फरक सन्दर्भमा प्रयोग गरिएको सामग्रीबीचको अन्तर देखाउन खोजिएको छ ।
उजुरीको ‘कसुरको प्रकृति र कसुरसँग सम्बन्धित अन्य विवरण’ शीर्षकअन्तर्गत किशोर श्रेष्ठजस्तो अभिव्यक्ति र सञ्चार क्षेत्रमा लामो समयदेखि सक्रिय व्यक्तिबाट आफूविरुद्ध गरिएको कार्यले व्यक्तिगत, पारिवारिक तथा सामाजिक जीवनमा गम्भीर चोट पुर्याएको दाबी गरिएको छ ।
विशेषगरी दाजु–बहिनीको सम्बन्धलाई समेत फरक अर्थ लाग्ने गरी प्रस्तुत गरिएको र त्यसबाट आफ्नो चरित्र तथा प्रतिष्ठामा असर पार्ने प्रयास भएको उजुरीकर्ताको दाबी छ । उजुरीमा यस्तो सामग्री प्रकाशनले आफूलाई मानसिक तनाव र सामाजिक अप्ठ्यारोमा पार्ने काम गरेको समेत उल्लेख गरिएको छ ।
सामाजिक सञ्जाल तथा अनलाइनमा प्रकाशित सामग्रीका स्क्रिनसट, उजुरीमा उल्लेख गरिएका व्यक्तिहरूसँग खिचिएका मूल तस्बिर, घटनासँग सम्बन्धित अन्य फोटो तथा डिजिटल सामग्रीलाई किशोर श्रेष्ठ विरुद्ध चरित्र हत्यासम्बन्धी कानुनी कारबाहीका लागि प्रमाणका रुपमा पेश गरिएको छ । उनले यी सामग्रीका आधारमा पत्रकार श्रेष्ठमाथि अनुसन्धान गरी कारबाही गर्न माग गरेकी छन् ।
उपसभामुख ठाकुरले आफ्नो दाबी तथा आरोप गलत ठहरिए कानुनबमोजिम हुने कारबाही स्वीकार गर्ने दाबी उजुरीमा गरेकी छन् । उजुरीको मुख्य आधार तस्बिरको प्रयोग, तस्बिरलाई काटछाँट गरी प्रस्तुत गरिएको दाबी, सामाजिक सञ्जाल तथा अनलाइनमा प्रकाशित सामग्री, त्यसमा प्रयोग भएको भाषाशैली र त्यसबाट व्यक्तिगत गोपनीयता तथा प्रतिष्ठामा परेको भनिएको छ ।
यो पनि पढ्नुहोस्
उपसभामुख रुबी ठाकुरले दिइन किशोर श्रेष्ठविरुद्ध उजुरी
उपसभामुखले गुहारिन् गृहमन्त्री ! ‘मलाई बचाउनुहुन्छ कि सुसाइड’ गरौँ ?
सर्वत्र आलोचनापछि उपसभामुख ठाकुरले हटाइन् स्टाटस
पत्रकार किशोर श्रेष्ठको पक्राउमा उपसभामुखको अशोभनीय पोष्ट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
