काठमाडौं– उपसभामुख रुविकुमारीले आफ्नो चरित्रलाई लिएर सामाजिक सञ्जालबाट आक्रमण बढेपछि गृहमन्त्री सुधन गुरुङ गुहारेकी छन् ।
जनआस्था पत्रिकाका सञ्चालक तथा पत्रकार किशोर श्रेष्ठ पक्राउपछि सामाजिक सञ्जालबाट आफूलाई मानसिक पीडा दिने काम बढिरहेको भन्दै फोन नै गरेर गृहमन्त्रीलाई आफूलाई बचाउन भनेकी हुन् ।
उपसभामुखका निकट स्रोतका अनुसार उनले शुक्रबार दिउँसो गृहमन्त्री गुरुङलाई फोन गरेर ‘मलाई बचाउनुहुन्छ कि सुसाइड गरौँ’ भन्दै बिलौना गरेकी छन् ।
जनआस्था पत्रिकाले केही दिन अगाडि उपसभामुख रुवीकुमारीको तस्बिर राखेर ‘सुध्रिनुस म्याडम, अझै समय छ’ भन्ने शीर्षकमा समाचार प्रकाशित गरेको थियो । सोही समाचारका कारण आफू र आफ्नो परिवार ठूलो तनावमा परेको उपसभामुखले गृहमन्त्री समक्ष सुनाइकी थिइन् ।
उक्त समाचारविरुद्ध उपसभामुखले प्रेस काउन्सिलमा पनि उजुरी दिइसकेकी छन् । उपसभामुख रुविकुमारीले प्रेस काउन्सिलमा दिएको उजुरीमा समाचारमा तथ्य, प्रमाण र विश्वसनीय स्रोतको बिना भ्रामक, आधारहीन तथा आफ्नो व्यक्तिगत पद प्रतिष्ठा, चरित्र र सामाजिक मर्यादामा आँच पुर्याउने किसिमका विषयवस्तु सम्प्रेषण गरिएको दाबी गरिएको छ । उक्त सामग्रीले आफ्नो सार्वजनिक प्रतिष्ठामा गम्भीर क्षति पुर्याउनुका साथै मानसिक तनाव तथा सामाजिक रूपमा समेत नकारात्मक असर सिर्जना गरेको उल्लेख छ।
‘पत्रकारिताको नाममा कुनै पनि व्यक्तिको प्रतिष्ठा, चरित्र र सार्वजनिक मर्यादामाथि आधारहीन आरोप, संकेत वा उत्तेजक प्रस्तुति गर्ने छुट कानुन तथा पत्रकारिता आचारसंहिताले प्रदान गर्दैन। अतः उक्त सामग्रीमा उल्लेखित प्रत्येक आरोप तथा दाबीको स्रोत, प्रमाण र आधार सम्बन्धित सञ्चारमाध्यम तथा जिम्मेवार व्यक्तिबाट झिकाई निष्पक्ष, गम्भीर र प्रभावकारी छानबिन गरिदिनुहुन अनुरोध गर्दछु’, प्रेस काउन्सिलमा दिइएको उजुरीमा भनिएको थियो ।
उनले उक्त घटनाका सम्बन्धमा छानबिन गरी जनआस्था डटकम, सञ्चालक÷सम्पादक किशोर श्रेष्ठ तथा संलग्न अन्य जिम्मेवार व्यक्तिहरूमाथि प्रचलित कानुनबमोजिम आवश्यक कारबाहीको समेत माग गरेकी थिइन् ।
प्रहरीले बुधबार साँझ किशोर श्रेष्ठलाई पक्राउ गरेको थियो भने बिहीबार काठमाडौँ जिल्ला अदालतबाट तीन दिनका लागि म्याद थप भइ प्रहरीले अनुसन्धान सुरु गरेको छ । सप्तरी–३ का सांसद अमरकान्त चौधरीले जनआस्था डटकममा प्रकाशित सामग्रीले आफ्नो गोपनीयताको हक हनन हुनुका साथै प्रतिष्ठामा समेत असर परेको दाबीसहित प्रहरीमा जाहेरी दिएपछि श्रेष्ठलाई पक्राउ गरिएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
