काठमाडौं– कर्णाली स्वास्थ्य विज्ञान प्रतिष्ठान जुम्लाको पदाधिकारी नियुक्तिको लागि खुला प्रतिस्पर्धाका लागि भन्दै तयार पारिएको कार्यविधि निश्चित व्यक्तिहरुको लागि मात्रै योग्य हुने गरी तयार पारिएको छ । जुम्लास्थित कर्णाली स्वास्थ्य विज्ञान प्रतिष्ठानमा पदाधिकारी छनोट तथा सिफारिससम्बन्धी नयाँ कार्यविधि जारी भएको दुई दिन नबित्दै संशोधन गरिए पनि केही मुख्य प्रावधानहरुका कारण खुला प्रतिस्पर्धाभन्दा पनि निश्चित केही व्यक्ति केन्द्रित मापदण्ड बनेको पाइएको छ ।
प्रतिष्ठानले साउन २७ गते सार्वजनिक गरेको कार्यविधिमा साउन २९ गते नै प्रथम संशोधन गर्दै केही प्रावधानहरू फेरबदल गरेको हो । शिक्षाध्यक्ष (रजिस्ट्रार बाहेकका अन्य पदाधिकारी), डीन र निर्देशकको शैक्षणिक तथा व्यावसायिक योग्यतालाई यथावत् वा स्पष्ट पारिए पनि विशेषगरी रजिस्ट्रार पदको शैक्षिक योग्यतामा हेरफेर गरिएको छ ।
पहिलो कार्यविधिमा निश्चित प्राविधिक तथा व्यवस्थापकीय विषयहरू तोकिएकोमा संशोधनमार्फत जुनसुकै विषयमा स्नातकोत्तर उत्तीर्ण गरेका व्यक्ति पनि रजिस्ट्रार पदका लागि योग्य हुने व्यवस्था गरिएको छ ।
साउन २७ गते प्रकाशित ‘कर्णाली स्वास्थ्य विज्ञान प्रतिष्ठानको पदाधिकारी छनोट तथा सिफारिस कार्यविधि २०८३’ को दफा ७ (क) मा रजिस्ट्रार पदका लागि न्यूनतम योग्यता तोक्दा “मान्यता प्राप्त विश्वविद्यालय वा शिक्षण संस्थाबाट चिकित्सा शास्त्र वा जनस्वास्थ्य वा जनप्रशासन वा व्यवस्थापन वा स्वास्थ्य विज्ञानको कुनै पनि विषयमा कम्तीमा स्नातकोत्तर तह हासिल गरेको हुनुपर्ने स्पष्ट सर्त राखिएको थियो ।
यसै दफा ७ (ग) मा मान्यता प्राप्त स्वास्थ्य विज्ञान प्रतिष्ठान, विश्वविद्यालय वा शिक्षण अस्पतालमा राजपत्राङ्गकित दृतिय श्रेणी वा सो सरहको अधिकृत पदमा न्यूनतम पाँच (५) वर्ष अनुभव भएको वा शिक्षण अस्पतालको सह–प्राध्यापक वा सो भन्दा माथिको पदमा दुई (२) वर्ष प्रध्यापन गरेको र दफा ७ (घ) प्रचलित कानुन बमोजिम स्थापित कुनै विश्वविद्यालय, प्रतिष्ठान, अस्पताल वा शैक्षिक तथा प्राज्ञिक संस्थाको पदाधिकारी वा विभागीय प्रमुख रही उत्कृष्ट व्यवस्थापकीय सीप क्षमता र कौशल प्रदर्शन गरेको भन्ने यी दुई बुँदाले निश्चित व्यक्ति केन्द्रित कार्यविधि तयार गरिएको देखिन्छ ।
साउन २९ गते उपकुलपति प्रा.डा. सूर्यमान म्याहाङम्बोद्वारा जारी कार्यविधि संशोधन सम्बन्धी सूचनामा उक्त प्रावधानलाई सच्याइएको जनाउँदै दफा ७ (क) मा ‘मान्यता प्राप्त विश्वविद्यालय वा शिक्षण संस्थाबाट कुनै पनि विषयमा कम्तीमा स्नातकोत्तर हासिल गरेको’ भनी कायम गरिएको छ । यसरी विषयगत सीमा हटाएर ‘जुनसुकै विषय’ समावेश गरिनु नै दुई दिनमै कार्यविधि संशोधन गर्नुको मुख्य कारण र उद्देश्य खुला प्रतिस्पर्धामार्फत् भन्ने थियो । तर यस्तो चाहेको भए सवैमा संशोधन आवश्यक थियो । तर संशोधन गरेको जस्तो मात्रै गरिएको छ । अन्य पदहरूको तुलना गर्दा रजिस्ट्रार पदमा गरिएको संशोधनको नियत कुनै सीमित व्यक्ति नियुक्तिका लागि मात्र गरिएको अझ स्पष्ट देखिन्छ ।
शिक्षाध्यक्ष (दफा ६), डीन (दफा ८) र निर्देशक (दफा ९) पदको हकमा भने पहिलो सूचना र संशोधित सूचना दुवैमा ‘चिकित्सा शास्त्र विज्ञानको कुनै पनि विषयमा कम्तीमा स्नातकोत्तर तह हासिल गरेको’ हुनुपर्ने कडा प्रावधानलाई निरन्तरता दिइएको छ। शिक्षाध्यक्षका लागि प्राध्यापक पदमा कम्तीमा ४ वर्षको अनुभव र ४ वटा अनुसन्धानमूलक लेख (२ प्रथम र २ सह–लेखक) आवश्यक पर्ने, डीन र निर्देशकका लागि सह–प्राध्यापक पदमा कम्तीमा १ वर्षको अनुभव र २ वटा अनुसन्धानमूलक लेख आवश्यक पर्ने जस्ता मापदण्डहरूमा कुनै परिवर्तन गरिएको छैन ।
केवल डीन पदको साउन २९ गतेको संशोधनमा केही प्राविधिक शब्दहरू (जस्तैः एसोसियट प्रोफेसर, फस्ट अथर, को–अथर, साइन्टिफीक रिसर्च आर्टीकल्स) को अङ्ग्रेजी रूपान्तरण थप गरी स्पष्ट पारिएको छ भने निर्देशक पदको दफा सङ्ख्या (पहिलोमा दफा १ लेखिएकोमा संशोधनमा दफा ९) सच्याइएको छ । प्रतिष्ठानका उपकुलपति प्रा.डा. सूर्यमान म्याहाङम्बोले रजिस्ट्रार पद प्राविधिक सँगै व्यवस्थापन र प्रशासनसँग जोडिएकोले जुन सुकै विषयमा स्नातकोत्तर गरेकोलाई प्रतिस्पर्धा गर्न मिल्ने व्यवस्था मिलाइएको बताए । तर उनको भनाइसँग संशोधित कार्यविधि नै बाझिएको छ । यस विषयमा टेलिफोनमा भएको कुराकानीमा उनले रजिस्ट्रार पदका लागि कसैलाई पनि निषेध नगरिएको जवाफ दिए ।
संशोधित कार्यविधिअनुसार त केही सीमित बाहेक अन्यलाई निषेध गरिएको जस्तै भयो नि? भन्ने प्रश्नमा उनले कार्यविधिमा तोकिएको मापदण्ड अनुसार योग्यता पुगेका उम्मेदवारले उक्त पदमा दरखास्त दिनसक्ने जवाफ दिए । उपकुलपतिले खुला प्रतिस्पर्धा हुने दाबी गरे पनि पनि दफा ७ को (ग) र (घ) ले भने निश्चित व्यक्तिहरुको लागि मात्रै यो कार्यविधि तयार पारेको जस्तो देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786622145.jpg)
-1786602170.png)
-1786513116.png)
