काठमाडौं– प्रतिनिधिसभा सार्वजनिक लेखा समितिको बैठकमा सांसद खगेन्द्र सुनारले नेपाल प्रहरी तथा सशस्त्र प्रहरी बलका पूर्वकर्मचारीप्रति लक्षित गरी दिएको अभिव्यक्तिप्रति पूर्वप्रहरी संगठनहरूले आपत्ति जनाएका छन्।
नेपाल पूर्वप्रहरी संगठन, पूर्वप्रहरी कर्मचारी परिषद्, पूर्वसशस्त्र प्रहरी संघ तथा सुरक्षा र न्याय अध्ययन केन्द्रले संयुक्त प्रेस विज्ञप्ति जारी गर्दै समितिको बैठकमा गृह मन्त्रालयका सचिव तथा नेपाल प्रहरी र सशस्त्र प्रहरी बलका प्रमुखहरूको उपस्थितिमा व्यक्त गरिएको अभिव्यक्ति अमर्यादित, तथ्यहीन तथा पूर्वाग्रही भएको दाबी गरेका छन्।
विज्ञप्तिमा उक्त अभिव्यक्तिले संसदीय मर्यादा, पदीय गरिमा, संस्थागत शिष्टाचार तथा व्यावसायिक आचरणको सीमासमेत अतिक्रमण गरेको उल्लेख छ।
पूर्वप्रहरी संगठनहरूले सार्वजनिक लेखा समितिलाई सार्वजनिक स्रोतको उपयोग, खरिद प्रक्रिया तथा सरकारी निकायको कार्यसम्पादनमाथि प्रश्न उठाउने पूर्ण अधिकार रहेको स्वीकार गरेका छन्।
तर, निर्णय वा कार्यसम्पादनमाथि तथ्य र प्रमाणका आधारमा प्रश्न उठाउनु तथा राष्ट्रसेवामा समर्पित पदाधिकारी वा संस्थाको व्यावसायिक निष्ठा र संस्थागत गरिमामाथि अमर्यादित टिप्पणी गर्नु फरक विषय भएको उनीहरूको भनाइ छ।
नेपाल प्रहरी र सशस्त्र प्रहरी बल राज्यको कानुन कार्यान्वयन, नागरिकको जीवन–सम्पत्ति तथा राष्ट्रिय सुरक्षाको संवेदनशील आधारस्तम्भ भएको उल्लेख गर्दै उनीहरूले सुरक्षा निकायका नेतृत्वमाथि हुने कुनै पनि प्रतिकूल प्रभावले सार्वजनिक तथा राष्ट्रिय सुरक्षामा असर पार्न सक्ने बताएका छन्।
विज्ञप्तिमा सुरक्षा निकायको जवाफदेहिता खोज्ने क्रममा समेत सुरक्षा संवेदनशीलता र संस्थागत मर्यादाको सम्मान गर्न आग्रह गरिएको छ।
साथै, संसदीय समितिको अधिकार वा छानबिन प्रक्रियाको विरोध नभएको स्पष्ट पार्दै त्यसलाई व्यक्तिगत आक्षेप वा सुरक्षा निकायको मनोबल कमजोर पार्ने माध्यम नबनाउन आग्रह गरिएको छ।
पूर्वप्रहरी संगठनहरूले गृह मन्त्रालय, संघीय संसद् तथा सम्बन्धित सरोकारवाला निकायसँग आगामी दिनमा राष्ट्रिय सुरक्षासँग जोडिएका संवेदनशील संगठन र तिनका प्रमुखलाई संसदीय समितिमा बोलाउँदा पदीय गरिमा, सम्मान र व्यावसायिक मर्यादा कायम राख्न माग गरेका छन्।
उनीहरूले सांसद खगेन्द्र सुनारलाई आफ्नो अमर्यादित व्यवहार सच्याउन तथा राष्ट्रको सुरक्षामा अहोरात्र खटिने संगठनहरूको मानमर्दन हुने कार्य तत्काल रोक्नसमेत आग्रह गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875773.jpg)
-1786602170.png)
-1786513116.png)
-1788425345.png)
