काठमाडौं– प्रतिनिधि सभाको सार्वजनिक लेखा समितिको बैठकमा नेपाल प्रहरीले गत प्रतिनिधि सभा निर्वाचनका लागि खरिद गरेको पोशाकलगायतका विषयमा भएको छलफलका क्रममा व्यक्त केही अभिव्यक्तिप्रति नेपाल प्रहरी पूर्व प्रहरी संगठन प्रमुख मञ्चले आपत्ति जनाएको छ ।
मञ्चले विशेषगरी बैठकमा प्रतिनिधि सभा सदस्य खगेन्द्र सुनारले नेपाल प्रहरी तथा वर्तमान प्रहरी महानिरीक्षक दानबहादुर कार्कीलगायतका विषयमा व्यक्त गरेको अभिव्यक्ति संसदीय मर्यादा, पदीय गरिमा र शिष्टाचारविपरीत रहेको जनाएको छ।
नेपाल प्रहरी पूर्व प्रहरी संगठन प्रमुख मञ्चका संयोजक मोतिलाल बोहराद्वारा हस्ताक्षरित विज्ञप्तिमा सरकारी तथा संस्थागत विषयमा उठ्ने राष्ट्र र जनसरोकारका मुद्दामाथि संसदीय समितिमा पर्याप्त छलफल र बहस हुनु लोकतान्त्रिक अभ्यासका लागि आवश्यक रहेको स्वीकार गरिएको छ। संसदीय समितिको संवैधानिक तथा संस्थागत अधिकारलाई आफूहरूले पूर्ण सम्मान गर्ने पनि मञ्चले स्पष्ट पारेको छ।
तर, देश र जनताको सुरक्षामा निरन्तर खटिने नेपाल प्रहरीजस्तो गरिमामय सुरक्षा संगठन र त्यसको नेतृत्वमाथि तथ्यहीन, अपमानजनक तथा नकारात्मक भाष्य निर्माण गर्ने प्रयास न्यायसंगत हुन नसक्ने मञ्चको भनाइ छ।
“सांसदजस्तो गरिमायुक्त र जिम्मेवार पदमा आसीन व्यक्तित्वबाट व्यक्त यस्ता अमर्यादित अभिव्यक्तिले संसदीय व्यवस्थाकै साखमाथि प्रश्नचिह्न खडा गर्ने जोखिम रहन्छ,” विज्ञप्तिमा उल्लेख गरिएको छ।
मञ्चले नेपाल प्रहरीको नेतृत्व स्थापित कानुनी प्रक्रिया, व्यावसायिक निष्ठा, विज्ञता र इमानदारीका आधारमा चयन हुने संस्थागत पद भएको दाबी गर्दै कुनै पनि जनप्रतिनिधिबाट सुरक्षा निकाय र यसको नेतृत्वमाथि पूर्वाग्रही तथा व्यक्तिलक्षित रूपमा गरिने निरन्तर टिप्पणीप्रति खेद व्यक्त गरेको छ।
मञ्चले लोकतान्त्रिक संस्थाहरूलाई बलियो बनाउन सभ्य, संयमित र मर्यादित भाषाशैली आवश्यक रहेको उल्लेख गर्दै सांसद सुनारलाई आफ्नो भाषाशैली तथा व्यवहारमा सुधार गर्न आग्रह गरेको छ। साथै, पदीय जिम्मेवारीको गाम्भीर्यलाई मनन गर्दै आगामी दिनमा यस्ता मनोगत अभिव्यक्ति नदोहोर्याउन पनि मञ्चले आग्रह गरेको छ।
विज्ञप्तिमा नेपाल प्रहरी पूर्व प्रहरी संगठन प्रमुख मञ्चका संयोजक तथा पूर्व प्रहरी महानिरीक्षक मोतिलाल बोहराको हस्ताक्षर रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
