काठमाडौँ– आज बिहान ८:३० बजेदेखि पुन: कर्फ्यु कडाइका साथ लागु हुने रौतहट जिल्ला प्रशासन कार्यालयले जनाएको छ ।
कर्फ्यु कडाइका साथ लागु हुने भन्दै पालना गर्न रौतहट प्रशासनले सूचना जारी गरेको छ ।
फागुन ७ गते राति करिब ९:५० मा बौधिमाई नगरपालिका-९ सरमुजवाबाट सबगढास्थित सत्यनारायण साहको घरतर्फ जाँदै गरेको जन्तीले मस्जिद अगाडि बाजा बजाएको विषयमा विवाद सुरु भएको बताइएको छ । सोही क्रममा राति ढुंगामुढा हुँदा ६ जना घाइते भएका थिए ।शनिबार बिहान करिब ९:१५ बजे पुनः सोही विषयलाई लिएर दुवै पक्षका करिब ५०० जना भेला भई दोहोरो झडपमा उत्रिएका थिए ।
प्रमुख जिल्ला अधिकारी दिनेश सागर भुसालद्वारा जारी सूचनाअनुसार, आइतबार बिहान ६:३० बजेदेखि ८:३० बजेसम्म दुई घण्टाका लागि कर्फ्यु खुकुलो पारिएको थियो।
तर, बिहान ८:३० बजेपछि भने अर्को आदेश नभएसम्मका लागि कर्फ्यु पुनः यथावत रहने प्रशासनले स्पष्ट पारेको छ।
बिहान कर्फ्यु खुकुलो हुँदा सर्वसाधारण दैनिक उपभोग्य बस्तु किनमेलमा छिटफुट निस्किएका छन् ।
प्रहरी प्रशासनले घटना बढाउन भूमिका खेलेको भन्दै २० जनालाई पक्राउ गरिसकेको छ । जनमत पार्टीका नेता शेख जमशेदसहित २० जना प्रहरी नियन्त्रणमा छन् ।
प्रशासनले सबै नागरिकलाई शान्ति सुव्यवस्था कायम राख्न र सरकारी आदेशको पूर्ण पालना गर्न अपिलसमेत गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
