काठमाडौं– सोमबार पनि सेयर बजारको गिरावटले निरन्तरता पाएको छ । बजार परिसूचक नेप्से अघिल्लो दिनको तुलनामा २.०७ अंक घटेको छ । अन्तिम १५ मिनेटको भारित औसत मूल्य समायोजन नहुँदा १२ अंक बढेको बजार समायोजनपछि २ अंक घटेको हो ।
सो घटाइपछि नेप्से परिसूचक २९६२ अंकमा कायम भएको छ । हिजो आइतबार पनि बजार १८.४४ अंक घटेको थियो । कारोबार खुलेपछि नै बजार ओरालो लाग्यो । १२ : ३८ बजे नेप्से २९१८ अंकसम्म झरेको थियो, जुन विन्दु आजका लागि न्यूनतम रह्यो । त्यसपछि सम्हालिएको बजार, उतारचढाव हुँदै अन्तिम समयमा झिनो अंकले रातो रहन पुग्यो ।
कारोबार रकममा पनि कमी आएको छ । अघिल्लो दिन २६ अर्ब ५७ करोडको कारोबार भएकोमा आज १९ अर्ब ३६ करोडको भयो । आज विकास बैंक र व्यापार समूह ३ प्रतिशतभन्दा धेरै बढे । व्यापार ३.२४ र विकास बैंक समूह ३.०४ प्रतिशत बढे । त्यस्तै फाइनान्स २.७५, उत्पादन तथा प्रशोधन १.७१ प्रतिशत बढे ।
बैंकिङ ०.८९, होटल तथा पर्यटन ०.२८, हाइड्रोपावर ०.५०, लगानी ०.१०, जीवन बीमा ०.६६, माइक्रोफाइनान्स ०.३३, निर्जीवन बीमा ०.७२ तथा अन्य ०.७६ प्रतिशत घटे ।
दुई कम्पनीको मूल्य १० प्रतिशत बढ्यो । १० प्रतिशत बढेका कम्पनीमा समता घरेलु लघुवित्त र सान्भी इनर्जी छन् । सूचीकृत भएपछि लगातार १० प्रतिशतका दरले मूल्य बढ्दै गएको सान्भी प्रतिकित्ता ६९८.६२ रुपैयाँ मूल्यमा पुगेको छ । त्यस्तै ट्रेड टावरको मूल्य ९.५३ प्रतिशत बढेर ७८०.९४ रुपैयाँ पुगेको छ ।
हिमालयन डिस्टिलरीको ५.८०, सांग्रिला डेभलपमेन्ट बैंकको ५.७३ प्रतिशत मूल्य बढ्यो । विन्ध्यबासिनी हाइड्रोपावरको ८.४९, ग्रिन भेन्चर्सको ५.०८ तथा उन्नति सहकार्य लघुवित्तको ४.४१ प्रतिशत मूल्य घट्यो ।
आज धेरै कारोबार भएका कम्पनीमा शिवम् सिमेन्ट, हिमालयन डिस्टिलरी, ङादी ग्रुप पावर, लुम्बिनी विकास बैंक र एचआईडीसीएल प्रोमोटर छन् । बजारको पूँजीकरण ४९ खर्ब ४२ अर्ब पुगेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786944464.png)
-1786602170.png)
-1786513116.png)
