काठमाडौं– त्रिभुवन अन्तर्राष्ट्रिय विमानस्थल विस्तारको काम तीव्र गतिमा अघि बढेको छ ।
नेपाल नागरिक उड्यन प्राधिकरणले त्रिभुवन विमानस्थलमा भइरहेको विमानस्थलको क्षमता अभिवृद्धिका लागि भइरहेको कामका बारेमा स्थलगत जानकारी गराउँदै विमानस्थल विस्तारको काम तीव्र गतिमा अघि बढेको र करिव अन्तिम चरणमा पुगेको जनाएको हो ।
धावनमार्ग जोड्न पूर्वतर्फ र पश्चिमतर्फ नयाँ ट्याक्सी वे निर्माण भइरहेको र यसका कारण रनवे क्षमता २५ प्रतिशतले बढ्ने महानिर्देशक प्रदीप अधिकारीले जानकारी दिए ।
उनले विमानस्थल भित्र रहेको आयल निगमको डिपो हटाउनुपर्ने र डिपो नहटे समानान्तर ट्याक्सी वे निर्माण अवरुद्ध हुन सक्ने उल्लेख गरे ।
अधिकारीले बुद्ध एयरको ह्यांगरको दक्षिण क्षेत्रमा दुई वटा ह्यांगर निर्माण हुने र उत्तरपट्टी नेपाल एयरलाइन्सको एउटा ह्यांगर निर्माण हुने जानकारी दिए । त्यस्तै अहिलेको स्थानमा रहेको नेपाल एयरलाईन्सको ह्यांगर र नेपाली सेनाको भिभिआइपी सारेपछि सोही स्थानमा त्रिभुवन विमानस्थल विस्तार गुरुयोजनाअन्तर्गत सुविधासम्पन्न दोस्रो अन्तर्राष्ट्रिय टर्मिनल भवन निर्माण बन्ने बताए ।
दोस्रो अन्तर्राष्ट्रिय टर्मिनल भवन निर्माणका लागि ठूलो बजेट आवश्यक पर्ने भएकाले यसमा सरकारसंग थप छलफल गर्न आवश्यक रहेको महानिर्देशक अधिकारीले जानकारी दिए ।
नयाँ अन्तर्राष्ट्रिय टर्मिनल भवन निर्माण भएपछि अहिलेको अन्तर्राष्ट्रिय टर्मिनललाई आन्तरिक टर्मिनलमा रुपान्तरण गरिने उनले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779193203.png)
-1764146706.png)
