काठमाडौं– १८ वर्ष मुनिका किशोरीहरुको डिम्बको कारोबार गरेको घटना बाहिर आएपछि स्वास्थ्य तथा जनसंख्या मन्त्रालयले निसन्तान उपचार केन्द्रका नाममा खुलेका दुई सेन्टरमाथि छानबिन सुरु गरेको छ।
मन्त्रालयले इनभिट्रो फर्टिलाइजेसन सेन्टर (आइभीएफ)का विषयमा प्रश्न उठेपछि तीन सदस्यीय छानबिन समिति गठन गरेको हो।
मन्त्रालयले सचिवस्तरिय निर्णय गर्दै किशोरीको डिम्ब कारोबार गरेको आरोपमा प्रहरीले पक्राउ गरेको होप फर्टिलिटी एण्ड डायग्नोस्टिक प्राली र एन्जल फर्टिलिटी क्लिनिकको छानबिनका लागि समिति गठन गरेको हो।
मन्त्रालयको गुणस्तर मापन तथा नियमन महाशाखाका प्रमुख डा सरोज शर्माका अनुसार प्रसूति तथा स्त्रीरोग विशेषज्ञ डा ज्वाला थापाको संयोजकत्वमा तीन सदस्यीय समिति बनेर काम सुरु भइसहेको छ। समितिमा मन्त्रालयमा कार्यरत डा सुनिता लम्साल र कानुन अधिकृत सुरेश चौलागाईं सदस्य रहेका छन्।
समिति शुक्रबार गठन भएको हो। समितिलाई अनुगमन गरेर प्रतिबेदन बुझाउन पाँच दिनको समय दिइएको छ।
प्रहरीको केन्द्रिय अनुसन्धान ब्युरोले होपका पाँच जनालाई पक्राउ गरेको थियो। अदालतले थुनामा नराखेर नै अनुसन्धान अगाडि बढाउन भनेपछि ब्युरोले उनीहरुलाई हाजिर जमानतमा छाडेको छ। यस्तै डिम्ब कारोबारका विषयमा एन्जल फर्टिलिटीको विषयमा पनि गुनासो आएपछि मन्त्रालयले उक्त संस्थाको पनि अनुगमन गर्ने गरी समिति बनाएको हो। एन्जलले भने आफूहरुमाथि गलत आरोप लगाइएको दाबी गरेको छ।
सिआइबीले पनि उक्त विषयमा थप अनुसन्धान अगाडि बढाइरहेको छ। सिआइबीका एक प्रहरीले दिएको जानकारी अनुसार हाजिर जमानतमा छाडे पनि उनीहरुविरुद्ध अनुसन्धान भने जारी नै रहेको छ।
ब्युरोको प्रारम्भिक अनुसन्धानमा होप फर्टिलिटीमा १८ वर्ष मुनिका किशोरीहरुलाई बोलाएर इन्जेक्सन लगाएर डिम्ब निकाल्ने गरेको र किशोरीहरुलाई १० हजार देखि १५ हजारसम्म रकम दिने गरेको देखिएको छ।
पीडित किशोरीहरुले दिएको जानकारी अनुसार होपमा उनीहरुलाई १० दिनसम्म इन्जेक्सन लगाएर राखिएको थियो। यसरी किशोरीहरुबाट निकालिएको डिम्ब विकास भइसकेपछि किशोरीको शरीरबाट डिम्ब निकालेर त्यसलाई सुरक्षित गरेर राख्ने गरेको प्रहरी अनुसन्धानमा देखिएको ब्युरोले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778409050-1778409499.jpeg)
-1764146706.png)
