काठमाडौं– सरकारले राजसंस्था पुनःस्थापनाको माग राखेर गरिएको आन्दोलन र त्यसका नेतृत्वकर्ताहरुसँग राजनीतिक व्यवहार नहुने प्रस्ट पारेको छ ।
राजावादीहरुसँग कुनै प्रकारको वार्ता, संवाद वा छलफलसमेत नभएको सरकारले जनाएको छ ।
राजसंस्था पुनःस्थापना जनआन्दोलन समितिले नवीन समझदारीका लागि संवाद गर्न एक साताको अल्टिमेटम दिएर शुक्रबार आन्दोलन थालेको थियो । पहिलो दिनकै आन्दोलन अराजकता र हिंसामा परिणत भएपछि आन्दोलनको नेतृत्वकर्ता कोही पक्राउमा छन् भने दुर्गा प्रसाईं फरार छन् ।
आन्दोलन परिचालन समितिका संयोजक नवराज सुवेदीले पूर्वराजालाई दोषारोपण नगर्न र आन्दोलनकारीसँग संवाद थाल्न विज्ञप्ति निकाले पनि सरकारले राजावादीसँग कुनै संवाद नहुने प्रस्ट पारेको हो ।
गृह मन्त्रालयका प्रवक्ता छवि रिजालले राजावादीहरुको कृत्य कुनै पनि प्रकारले राजनीतिक नभएको र उनीहरुले मानवताविरोधी अपराध गरेकाले राजनीतिक व्यवहार वा संवादको सम्भावना नरहेको बताए । रिजालले राजावादी आन्दोलनकर्ताहरुमाथि मानवताविरोधी अपराध, डाँका र संगठित अपराधको मुद्दा चल्न सक्ने बताएका छन् ।
मन्त्रिपरिषद् बैठकमा शुक्रबार राति यसबारेमा छलफल भएको र पूर्वराजा ज्ञानेन्द्र शाहको इशारामा सबै घटना भएको भन्दै उनीमाथि अनुसन्धान थाल्नेबारे चर्चा चलेको थियो । त्यसलगत्तै सरकारले पूर्वराजाको पासपोर्ट रद्द गरी सरकारले दिँदै आएको पछुवा गाडीसहितका सुरक्षाकर्मी र सरकारी सेवा सुविधा खोस्ने तयारी थालिएको छ ।
पूर्वराजालाई नागार्जुन दरवारबाट पनि बेदखल गर्ने तयारी छ । आन्दोलनको अघिल्लो दिन नवराज सुवेदी र दुर्गा प्रसाईंलाई निर्मल निवासमा बोलाएर पूर्वराजाले पालैपालो निर्देशन दिएको सरकारको दाबी छ ।
त्यसको भोलिपल्ट आगजनी, लुटपाट र हत्याका घटना भएकाले पूर्वराजासहित राजावादीहरुसँग कुनै प्रकारको राजनीतिक व्यवहार नहुने गृहमन्त्री रमेश लेखकले नेपाल प्रेससँग बताए ।
राजावादीहरुका माग असंवैधानिक र क्रियाकलाप अराजक तथा मानवताविरोधी रहेकाले संवादको कुनै सम्भावना नरहेको गृह मन्त्रालयले प्रस्ट पारेको छ । शुक्रबारको घटनामा संलग्न सबैमाथि मुद्दा चलाउन प्रहरी प्रतिवेदन तयार भइरहेको काठमाडौं जिल्ला प्रहरी परिसरकार प्रमुख विश्व अधिकारीले बताएका छन् ।
तोडफोड, आगजनी र लुटपाट भएका सबै स्थानको सीसीटीभी फुटेजहरु संकलन गरिएको र बाहिर आएका भिडिओहरुका आधारमा समेत पहिचान गरेर सबैलाई कानूनको दायरामा ल्याइने उपत्यका अपराध महाशाखाका प्रमुख एसएसपी रमेश बस्नेतले बताए ।
लुटपाट र आगजनीका घटनामा कतिपय पेशेवर अपराधीहरुसमेत संलग्न रहेको पाइएको प्रहरीको भनाइ छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
