धुन्चे– रसुवाको पर्यटकीय स्थलहरुमा स्वदेशी तथा विदेशी पर्यटक आउने क्रम बढेको छ। हिमाली क्षेत्रको पदयात्राका लागि सिजन सुरु भएसँगै दैनिक आन्तरिक तथा वाह्य पर्यटकको आगमनमा वृद्धि भएको हो।
नेपालको तेस्रो पर्यटकीय गन्तव्य स्थलका रूपमा रहेको लाङटाङ तथा गोसाइँकुण्ड क्षेत्रमा हिमाली दृश्यावलोकन गर्न आउने पर्यटकको संख्या बढेको लाङटाङ राष्ट्रिय निकुञ्ज कार्यालय रसुवाले जनाएको छ।
असोज र कात्तिक महिना पर्यटकको आगमन हुने मुख्य याम भएकाले अहिले दैनिक सयभन्दा बढी विदेशि पर्यटक रसुवा आउने गरेको लामटाङ राष्ट्रिय निकुञ्जका प्रमुख संरक्षण अधिकृत युवराज रेग्मिले बताए। यस्तै, त्यति नै संख्याको हाराहारीमा स्वदेशी पर्यटक पनि आइरहेको उनले जानकारी दिए।
होटल भरिभराउ
रसुवामा स्वदेशी तथा विदेशी पर्यटक बढेपछि होटल व्यवसायी उत्साहित बनेका छन्। दशैं सकिएलगत्तै पर्यटक बढेपछि जिल्लाका होटलहरु भरिभराउ भएका छन्।
केही वर्षअघिसम्म नेपाली राख्न नरुचाउने होटल व्यावसायी अहिले नेपाली आउँदा पनि उत्साहित हुने गरेका छन्। विदेशी पर्यटकले भन्दा नेपालीले बढी खर्च गर्ने गरेको व्यवसायीहरु बताउँछन्।
रसुवा सदरमुकाम धुन्चे, स्याफ्रु, गोसाइँकुण्ड पदमार्ग र लाङटाङ पदमार्गमा सञ्चालित होटलहरु अहिले पर्यटकले भरिएका छन्। केही वर्ष पहिलेसम्म मेला पर्वको अवसरमा मात्र पर्यटक भित्रने गरे पनि अहिलेका युवा पुस्ता अन्य समयमा घुमफिर गर्न मन पराउने भएका कारण बाह्रै महिना पर्यटक आउन थालेका हुन्। स्वदेशी पर्यटकले न्यूनतम पाँच देखि १५ हजार रुपैयाँसम्म खर्च गर्ने गरेको होटल व्यवसायीहरु बताउँछन्। रसुवामा साना–ठूला गरी डेढ सयको हाराहारी होटल सञ्चालनमा छन्।
यस्तै, नेपालको तेस्रो ठूलो पर्यटकीय गन्तव्य मानिएको लाङटाङ क्षेत्रमा पर्यटकको आगमन बढ्दै गएको छ। भूकम्पपछि असमान्य भएको स्थानीयबासीको दैनिकी पनि अहिले पुरानो अवस्थामा फर्किएसँगै पर्यटन प्रवद्र्धनमा केन्द्रित हुँदै गएको छ। भुकम्पअघि वार्षिक १५ हजार पर्यटकले अवलोकन गर्ने लाङटाङ क्षेत्रमा अहिले पर्यटकको आवागमन बढ्न थालेको हो।
भुकम्पपछि पुनःनिर्माण अन्तर्गत लाङटाङ तथा गोसाइँकुण्ड र तामाङ सम्पदा मार्गमा पर्यटकीय होटेल तथा लजको व्यवस्थापन भइसकेकाले पाहुनालाई खानपिन र बसोबासमा कुनै समस्या नआउने व्यवसायीले बताएका छन्।
विशेषगरी, रसुवा भित्रने पर्यटकहरूमा नेदरल्यान्ड, इजरायल, जापान, फ्रान्स लगायत देशका नागारिक छन्।
स्थानीय तामाङ कला–संस्कृति, निकुञ्ज क्षेत्रभित्रका जैविक विविधता, सीमसार क्षेत्रमा सूचिकृत गोसाइँकुण्ड, तातोपानी, गतलाङ, बृद्धिम होमस्टे, रसुवागढी तथा तामाङ सम्पदा मार्ग लगायतका विभिन्न क्षेत्र पर्यटकका लागि प्रमुख आकर्षणको केन्द्रमा छन्।
स्वदेशी पर्यटकको पनि तथ्यांक राखिने
रसुवामा कार्तिक महिनादेखि स्वदेशी पर्यटकको पनि तथ्यांक राखिने भएको छ। जिल्लामा पछिल्लो समय स्वदेशी पर्यटकको आगमनमा वृद्धि हुन थालेपछि लाङटाङ राष्ट्रिय निकुञ्जले तथ्यांक राख्न लागेको हो।
रसुवामा भित्रने स्वदेशी पर्यटकको तथ्यांक नराख्दा पर्यटक हराउने, असुरक्षा बढ्ने, यकिन तथ्यांक नभेटिने जस्ता समस्या आउने गरेका छन्। हिमाली राष्ट्रिय निकुञ्ज नियमवाली, २०३६ अनुसार नेपालीलाई शुल्क नलाग्ने भएकाले तथ्यांक राख्ने नगरिएको निकुञ्जले जनाएको छ।
निकुञ्जका प्रमुख संरक्षण अधिकृत युवराज रेग्मीले भने, ‘विदेशी तथा सार्क राष्ट्रका पर्यटकले निकुञ्ज प्रवेशका लागि प्रवेश शुल्क तिर्नुपर्ने भएकाले तथ्यांक राख्ने गरिए पनि नेपालीले शुल्क तिर्नु नपर्ने हुँदा तथ्यांक राख्ने नगरिएको हो।’
अर्को महिनाबाट स्वदेशी पर्यटकको पनि तथ्यांक राख्न सुरु गरिने निकुञ्जका प्रमुख संरक्षण अधिकृत युवराज रेग्मीले बताए। उनले भने, ‘स्वदेशी पर्यटकको तथ्यांक नराखिँदा समस्या आएको छ, यही कार्तिक महिनादेखि तथ्यांक संकलनका लागि कार्ययोजना बनाएका छौं।’
वार्षिक २५ हजारभन्दा बढी स्वदेशी पर्यटक जिल्ला भित्रने गरे पनि तथ्यांक नराखिँदा यसको वास्तविक अवस्था थाहा हुन नसकेको हो।
अन्य क्षेत्रमा होटल व्यवसायीले स्वदेशी पर्यटकको तथ्यांक राख्ने गरेको, तर यहाँ त्यो अवस्था नरहेको भन्दै रेग्मीले अबका दिनका होटललाई समेत तथ्यांक राख्नका लागि निर्देशन दिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
