काठमाडौं – निजामती कर्मचारी अस्पतालको कार्यकारी निर्देशकका लागि सिफारिसमा परेका तीन जनाको नाम औपचारिक रुपमा सार्वजनिक गरिएको छ । निर्देशकका लागि आवेदन दिएका १० जनामध्ये प्रस्तूतीकरण र अन्तर्वार्ताका आधारमा तीन जनाको नाम सिफारिस गरिएको हो ।
संघीय मामिला तथा सामान्य प्रशासन मन्त्रालयले सिफारिसमा परेका तीन जनाको नाम सार्वजनिक गरेको हो । मन्त्रालयले सार्वजनिक गरेको नाम अनुसार कार्यकारी निर्देशकका लागि एक नम्बरमा डा. प्रमोद यादव, दोस्रो नम्बरमा डा. रुद्र मरासिनी र तीन नम्बरमा डा. मोहनचन्द्र रेग्मीको नाम सिफारिसमा परेको छ ।
सिफारिसमा परेकामध्ये डा. यादव स्वास्थ्य सेवा अन्तर्गत १०औं तहका सर्जन हुन् । उनी यसअघि ट्रमा सेन्टरको मेडिकल सुपरिटेन्डेन्ट र जनकपुर अस्पतालको सुपरिटेन्डेन्ट भइसकेका छन् ।
डा. मरासिनी स्वास्थ्य सेवा अन्तर्गत ११औं तहमा कार्यरत अर्थोपेडिक्स सर्जन हुन् । उनले ट्रमा सेन्टर र भरतपुर अस्पतालको निर्देशकको जिम्मेवारी सम्हालिसकेका छन् । यसका साथै उनले स्वास्थ्य सेवा विभागको व्यवस्थापन महाशाखा र इपिडिमियोलोजी तथा रोग नियन्त्रण महाशाखाको निर्देशकको जिम्मेवारी समेत सम्हालिसकेका छन् ।
डा. रेग्मी प्रसूति तथा स्त्रीरोग विशेषज्ञ हुन् । उनी यसअघि बीपी कोइराला स्वास्थ्य विज्ञान प्रतिष्ठान धरानको रजिष्ट्रार थिए । प्रतिष्ठानको रजिष्ट्रार हुँदा विवादमा आएपछि उनले बिचमै राजीनामा दिएका थिए । उनी हाल काजमा निजामती अस्पतालमा कार्यरत छन् ।
मुख्यसचिव अध्यक्ष रहेको अस्पताल विकास समितिले निर्देशक नियुक्तिका लागि आवश्यक प्रक्रिया अगाडि बढाएको हो । अस्पताल विकास समिति गठन आदेश अनुसार समितिले सिफारिसमा परेका तीनजनामध्ये एक जनालाई कार्यकारी निर्देशक नियुक्त गर्ने छ ।
समितिमा सामान्य प्रशासन मन्त्रालयका सचिव, स्वास्थ्य तथा जनसंख्या मन्त्रालयका सचिव, कानुन मन्त्रालयका सचिव, अर्थ मन्त्रालयका सचिव सदस्य रहने छन् । यसका साथै समितिमा चिकित्सा क्षेत्रबाट मनोनित एक जना सदस्य समेत रहेका छन् ।
कार्यकारी निर्देशकको नियुक्तिका लागि संघीय मामिला तथा सामान्य प्रशासन मन्त्रालयले १० गते आवेदन खुला गरेको थियो । मन्त्रालयले १५ दिनको समय दिएर खुलाएको आवेदनमा निर्धारित समयभित्र १० जनाले आवेदन दिएका थिए ।
आवेदन दिनेहरुमा अस्पतालका हालका निर्देशक डा. विधाननिधि पौडेल, डा. विशेष पौडेल, डा रुद्र मरासिनी, डा मोहनचन्द्र रेग्मी, डा रोशन न्यौपाने, डा. अजित खनाल, डा. अनुज रायमाझी, डा विश्वराम पौडेल, डा प्रदिप यादव र डा. श्रवण थापा रहेका छन् । अस्पतालका हालका निर्देशक डा. पौडेलको कार्यकाल फागुन २५ गतेबाट सकिँदै छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
