काठमाडौ- बालुवा व्यवसायीसँग घुस लिएको आरोपमा अख्तियार दुरुपयोग अनुसन्धान आयोगले महानगरीय प्रहरी प्रभाग, सानोठिमी भक्तपुरमा कार्यरत प्रहरी नायव निरीक्षक ज्योति बिष्टलाई पनि नियन्त्रणमा लिएको छ।
यसअघि अख्तियारले काँडाघारी र कोटेश्वरमा अप्रेशन गरेर ९ जना प्रहरी कर्मचारीलाई नियन्त्रणमा लिएको थियो। थप अनुसन्धानको लागि विष्टलाई अख्तियारले मंगलबार नियन्त्रणमा लिएको हो।
अवैध तरिकाले बालुवा निकाली बिक्री गर्ने गिरोहसँग मिलेर घुस लिईरहेको समयमा भदौ ३० गते अख्तियारले घुससहित ९ प्रहरीलाई नियन्त्रणमा लिएको थियो।
घुस रकमसहित अख्तियारको फन्दामा पर्नेमा महानगरीय प्रहरी प्रभाग काँडाघारीमा कार्यरत प्रहरी सहायक निरीक्षक (असई) गोपाल श्रेष्ठ र महानगरीय प्रहरी वृत्त ठिमीमा कार्यरत सुवास ढुंगानासहित ९ जना रहेका थिए।
आयोगबाट खटिएको प्रहरी टोलीले श्रेष्ठलाई ३० हजार घुस रकमसहित कोटेश्वरको मुनिभैरव मन्दिर नजिकै रहेको लुम्बिनी तन्दुरी भोजनालयबाट नियन्त्रणमा लिएको थियो।
लुम्बिनी तन्दुरी भोजनालयबाट आयोगले महानगरीय प्रहरी प्रभाग कोटेश्वरमा कार्यरत प्रहरी जवान मुकेश पटेललाई पनि नियन्त्रणमा लिएको थियो। पटेलको साथबाट ५ हजार घुस रकम बरामद गरिएको थियो।
पक्राउ पर्नेहरुमा दुईजना प्रहरी सहायक निरीक्षक (असई), दुई हबल्दार र चार जना प्रहरी जवान रहेका थिए।
प्रहरी कर्मचारीले मनोहरा खोलाको बालुवा निकाल्ने सेटिङ मिलाईदिने भन्दै ठेकेदारसँग घुस मागेको अख्तियारले जनाएको छ। पक्राउ परेकाहरुको साथबाट आयोगको टोलीले कुल एक लाख नगद बरामद गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
