धनगढी- नागरिक उन्मुक्ति पार्टी (नाउपा) को बैठकले सुदूरपश्चिम प्रदेशका मुख्यमन्त्री कमलबहादुर शाहलाई दिएको समर्थन फिर्ता लिने निर्णय गर्यो। तर प्रदेश सभा सदस्यहरू भने उक्त निर्णयमा असहमत देखिएका छन्।
अध्यक्ष रञ्जिता श्रेष्ठको अध्यक्षतामा बुधबार टीकापुरमा बसेको बैठकले गरेको निर्णयको पक्षमा प्रदेश सभा सदस्यहरू सहमत नभएको उनीहरूको भनाइ छ। नागरिक उन्मुक्ति पार्टी सदूरपश्चिप प्रदेश सभाको संसदीय दलको बैठकले मुख्यमन्त्री शाहलाई नै समर्थन गर्ने निर्णय नै गरेको छ।
पार्टी संसदीय दलका नेता रामेश्वर चौधरीले प्रदेशको निर्णय गर्ने आफ्नै स्वायत्तता रहेकाले वर्तमान सरकारकै समर्थन गर्ने बताए। उनले भने, ‘लुम्बिनी प्रदेशमा पनि केन्द्रको गठबन्धनभन्दा फरक मत देखिएको छ। अनि सुदूरपश्चिममा मात्र यत्रो महाभारत किन?’
उनले मुख्यमन्त्री शाहले विश्वासको मत लग्दा पार्टीका सबै प्रदेश सभा सदस्य एकमत हुने बताए।
उनले संघमा प्रचण्ड सरकारको समर्थन भए पनि प्रदेशमा फरक निर्णय लिनुलाई स्वभाविक रूपमा लिनुपर्ने बताउँदै संघीय संरचना अनुसार केन्द्रको दबाबमा प्रदेश माननीय चल्नु नहुने बताए। उनले आफ्नो अधिकारको स्वनिर्णय गरी आफूहरु अघि बढ्ने समेत बताए।
बुधबार नयाँ गठबन्धनसँग वार्ता गर्ने र सोही अनुसार सुदूरपश्चिम प्रदेश सरकारलाई दिएको समर्थन फिर्ता लिने निर्णय नाउपाले गरेको थियो।
बुधबारको बैठकमा सुदूरपश्चिम प्रदेश सभाका सात जना प्रदेश सभा सदस्यहरुमध्ये विना विभागीय मन्त्री लक्ष्मणकिशोर चौधरी र पूर्वराज्यमन्त्री कैलाशी चौधरीको मात्रै सहभागिता रहेको थियो। संस्थापक रेशम चौधरी भने जापानमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
