काठमाडौं– संविधानमा उल्लेख भएका मौलिक हक कार्यान्वयनका लागि कानुन बन्ने क्रम सुरु भएको छ।
मौलिक हक कार्यान्वयनका लागि सरकारले निर्माण गरेको मस्यौदा धमाधम संसदबाट पारित हुँदै कानुनको रुपमा आउन थालेका हुन्। असोज २ गतेभित्र जारी भइसक्नु पर्ने बाध्यताका बीचमा मौलिक हक सम्बन्धी विधेयकहरु प्रतिनिधिसभा र राष्ट्रियसभामा पेश हुँदै छन्। प्रतिनिधिसभामा पेस भएका ११, राष्ट्रियसभामा रहेका ४ र समितिमा रहेका २ विधेयक पारित हुने क्रम सुरु भएको हो।
राष्ट्रियसभाबाट हालसम्म तीन विधेयक पारित गर्दै प्रतिनिधिसभामा आएका छन् भने प्रतिनिधिसभाले शुक्रबार ७ वटा विधेयक पारित गर्दै राष्ट्रियसभामा पठाएको छ। बाँकी विधेयकहरु अर्को बैठकले पारित गर्ने तयारी भइरहेको छ। संघीय संसदको दुवै सदनबाट पारित भएपछि विधेयक राष्ट्रपतिबाट प्रमाणिकरण भई राजपत्रमा प्रकाशित भएपछि कानुनको रुपमा लागू हुने छ।
प्रतिनिधिसभाको शुक्रबार बसेको बैठकले उपप्रधान एवम् स्वास्थ्य तथा जनसंख्यामन्त्री उपेन्द्र यादवले पारित गरियोस् भनी छुट्टाछुट्टै रूपमा प्रस्तुत गरेका सुरक्षित मातृत्व तथा प्रजनन् स्वास्थ्य अधिकार विधेयक, २०७५, र जनस्वास्थ्य विधेयक, २०७५ लाई सर्वसम्मतीले पारित गरेको छ।
श्रम, रोजगार तथा सामाजिक सुरक्षामन्त्री गोकर्ण विष्टले प्रस्तुत गरेको रोजगारीको हक सम्बन्धी विधेयक, २०७५ र उद्योग वाणिज्य तथा आपूर्ति मन्त्री मातृकाप्रसाद यादवले प्रस्तुत गरेको उपभोक्ता संरक्षण विधेयक, २०७५ समेत पारित भएको छ।
कृषि तथा पशुपंक्षी विकासमन्त्री चक्रपाणी खनालले प्रस्तुत गरेको खाद्य अधिकार तथा खाद्य सम्प्रभुता सम्बन्धी विधेयक, २०७५ र सहरी विकास मन्त्री मोहम्मद इस्तियाक राईले प्रस्तुत गरेको आवासको अधिकार सम्बन्धी विधेयक, २०७५ लाईसमेत बैठकले सर्वसम्मतीले पारित गर्दै राष्ट्रियसभामा पठाएको छ।
भूमि व्यवस्था, सहकारी तथा गरिबीमन्त्री पद्माकुमारी अर्यालको तर्फबाट कानुन, न्याय तथा संसदीय मामिलामन्त्री भानुभक्त ढकालले प्रस्तुत गरेको भूमिसम्बन्धी सातौं संशोधन विधेयक, २०७५ लाई पनि बैठकले पारित गरेको छ।
प्रतिनिधिसभा बैठकमा राज्य व्यवस्था तथा सुशासन समितिकी ज्येष्ठ सदस्य मीना पाण्डेले प्रस्तुत गरेको वैयक्तिक गोपनियता र जातीय भेदभाव तथा छुवाछुत कसुर र सजाय पहिलो संशोधन विधेयक सदनमा पेश भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763140555.png)
