काठमाडौं– वीरगन्ज महानगरपालिकाका मेयर विजय सरावगीले आफ्नो पार्टी संघीय समाजवादी फोरमबाट राजीनामा दिएका छन्। महानगरको कामकारबाहीमा अनावश्यक दबाव दिइएको भन्दै उनले पार्टीबाट राजीनामा दिएका हुन्।
सरावगी संघीय समाजवादी फोरमबाट वीरगन्जको मेयरमा निर्वाचित भएका थिए।
पार्टीभित्रको कार्यशैलीमा असन्तुष्टि बढेकाले आफूले पार्टीबाट अलग बस्ने निर्णय गरेको उनले बताएका छन्। 'पार्टीको काम गर्ने शैली र पद्धति मन परेन,' नेपाल लाइभसँग कुरा गर्दै उनले भने, 'त्यही भएर मैले संगठन र पार्टीको कुनै पनि जिम्मेवारीमा नबस्ने जानकारी गराइसकेको छु।'
मेयर सरावगीले ह्वाट्सएपमार्फत पार्टी नेतृत्वलाई राजीनामा पत्र बुझाएका छन्। अब नेतृत्वलाई भेटेर पनि पार्टीबाट राजीनामा दिएको पत्र बुझाउने उनको तयारी छ।
तर, फोरमका नेताहरुले भने मेयर सरावगीले एक वर्षमा पनि प्रभावकारी रुपमा काम गर्न नसकेको भन्दै पार्टीभित्र आलोचना मात्र भएको टिप्पणी गरेका छन्।
बुधबार बसेको वीरगन्ज नगर कमिटीको बैठकले ५ बुँदे ध्यानाकर्षण सरावगीलाई गराउने निर्णय पार्टीले गरेको थियो। नगर समितिले ध्यानाकर्षणपत्र बुझाउन खोज्दा सरावगीले समय नभएको भन्दै बुझ्न नमानेपछि आन्तरिक विवाद चुलिएको थियो।
मेयरको रुपमा जनताको हितमा काम गर्नु पर्नेमा पार्टीको हितमा काम गर्न दबाब आएकाले अलग हुने निर्णय गरेको उनले स्वीकार गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
