काठमाडौं– थिएटर मल कीर्तिपुर रङ्गमञ्चमा पपेट नाटक ‘चिरुचिरु मिचिरु’ मञ्चन भएको छ। नाटकलाई पपेट थिएटरमा अभ्यस्त जापानकी रङ्गकर्मी इरिना सजीले लेखन, परिकल्पना तथा निर्देशन गरेकी हुन्।
जापानको उतारभिजन थिएटर कम्पनी र नेपालको थिएटर सेन्टर फर चिल्ड्रेन नेपाल र थिएटर मलको संयुक्त आयोजना भएको कार्यशालाबाट पपेट नाटक ‘चिरुचिरु मिचिरु’ तयार पारिएको हो। यससँगै १० दिने पपेट थिएटर कार्यशाला सकिएको छ।
कार्यशालालाई राराहिल मेमोरियल स्कूल र आसितेज नेपालले सहकार्य गरेको थियो। यसै नाटक उतारभिजनले जापानमा पनि आगामी मार्चमा मञ्चन गर्नेछ।
नाटक ‘चिरुचिरु मिचिरु’मा दुई बालकले नीलो चराको खोजीका लागि गरेको सपनाको यात्राको कथालाई बालसुलभ शैलीमा प्रस्तुत गरिएको थियो। सपनाको यात्रामा उनीहरूले अलौकिक संसारमा विभिन्न पात्रहरुसँग भेट्दै नीलो चरासम्म पुग्ने प्रयास गर्छन्।
यात्राका क्रममा उनीहरूले गरेका प्रयास, भोगेका रोमाञ्चकारी घटनाहरुलाई कलाकार र पपेटमार्फत नाटकले प्रस्तुत गरेको थियो। सपनाबाट ब्युँझिपछि घरको नीलो चरा उपहार दिएर छिमेकीको बिरामी छोरीलाई निको बनाउन दुई बालकले गरेको मदत ‘चिरुचिरु मिचिरु’मा थियो।
नाटक र पपेट कार्यशालामा शंकर भण्डारी, सवीर चुरौटे, सुस्मिता गुरागाईं, पूजा ढकाल, मञ्जु गिरी, राज्यलक्ष्मी महर्जन, मञ्जु महर्जन, इलिना नकर्मी, आभा प्रधान, सौजन लिम्बु, शोभा कार्की, सुमन नापित, सौभाग्य सिहं, स्योन, रौनक कार्की लगायतको सहभागिता थियो।
त्यसैगरी जापानबाट निर्देशक इरिना सजीसहित चार जना कलाकार कार्यशालाका मेन्टर थिए।
नेपालमा थिएटरका अनेक गतिविधि भएपनि पपेट नाटक मञ्चन भएको पाइँदैन। जापानको उतरभिजन थिएटरसँगको सहकार्यमा थिएटर सेन्टर फर चिल्ड्रेन नेपाल र थिएटर मलले यस वर्ष र सन् २०१९ मा गरेको पपेट नाटक मञ्चन नै नेपाली भाषाको भएको पपेट नाटक मञ्चन मानिन्छ।
यद्यपी नेपालमा भएका नाट्य महोत्सवमा बेलाबखत विदेशीभाषी पपेट नाटक भएको भने पाइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
