काठमाडौं– थिएटर आकारको प्रस्तुतिमा मण्डला नाटकघरमा नाटक `पगला घोडा´ मञ्चन हुने भएको छ।
निर्माण टिमले नाटकको पोस्टर सार्वजनिक गरेको छ। नाटक पुस १२ गतेबाट माघ ६ गते सम्म सोमबार बाहेक हरेक दिन मञ्चन हुनेछ। शनिबार भने दुई शो राखिएको छ।
भारतीय सुप्रसिद्ध नाटककार बादल सरकारको कथा रहेको यस नाटक नेपाली भाषामा अनुवाद गर्दै मञ्चन गर्न लागिएको हो। बादल सरकार सन् १९७० को दशकमा प्रगतिशील,स्थापना विरोधी नाटकहरूका लागि परिचित थिए।
नाटकलाई निर्देशक घनश्याम श्रेष्ठले निर्देशन गर्दै छन्। पछिल्लो समय विभिन्न कारणले युवा वर्गमा आत्महत्या गर्नेको सङ्ख्यामा वृद्धि भइरहेको छ। संवेदनशील विषयवस्तुलाई दर्शक माझ कलामार्फत् सम्बोधन गर्न र यस अवस्थाको बारेमा मानिसहरूलाई सचेत गराउन नाटकको परिकल्पना गरिएको उनी बताउँछन्।
अहिले समाजमा घटेको घटनालाई दर्शक सामु प्रत्यक्ष रुपमा देखाउनलाई 'पगला घोडा' एक उत्कृष्ट कथा रहेको उनको भनाइ छ।
नाटकमा रङ्गमञ्चका अब्बल कलाकारहरूको अभिनय रहेको छ। कलाकारहरू प्रमोद अग्रहरी, मलिका महत, आशान्त शर्मा, विजय ताम्राकार, बिम्ब अधिकारी लगायत मञ्चमा देखिने छन्।
नाटकमा सुष्मा कोइराला सहायक निर्देशक र शंकर भण्डारी स्टेज म्यानेजरको रुपमा रहेका छन्।
यस नाटकको नेपाली अनुवाद शिव खाँड ठकुरीले गरेका हुन्। उनलाई अनुवादमा आलेख सुपरिवेक्षकको रुपमा कलाकार तथा निर्देशक आशान्त शर्माले सहयोग गरेका छन्।
२०६८ सालमा स्थापना भएको थिएटर आकारले थुप्रै नाटक मञ्चन गरिसकेको छ। 'अनुहार हराएको' , 'बिम्बाको सपना' , 'यो कुनै बास हो एक', 'बेड नम्बर ९९' , 'तीन बहिनी', सोलो म्युजिकल प्रस्तुति`(भरत नाट्यम्) लगायत छन्। नाटकलाई जोए ,मण्डला थिएटर , भव्: , हाम्रो पात्रो , पठाओ, भिडियो पसल , रमाइलो एप , सानदार क्याफे लगायतले प्रचारमा सहयोग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
