काठमाडौं– नेपाल र माल्दिभ्सबीच साफ सुजुकी कपमा ६ पटक प्रतिस्पर्धा भइसकेको छ। यसअघि साफ च्याम्पियनसिपको नाममा हुने प्रतियोगिताका ६ वटै प्रतिस्पर्धामा नेपालले जित निकाल्न सकेको छैन। नेपाल ४ खेलमा पराजित भएको छ भने २ खेलमा बराबरीमा रोकिएको छ।
साफमा पछिल्लो पटक नेपाल र माल्दिभ्सबीच सन् २०११ मा प्रतिस्पर्धा भएको थियो। दिल्लीमा भएको सो खेलमा नेपाल र माल्दिभ्सले १–१ गोलको बराबरी खेल्दै अंक बाँडेका थिए। त्यसअघि सन् २००९ को संस्करणमा पनि दुवै टिमले १–१ को बराबरी खेलेका थिए। त्यसअघि भएका ४ प्रतिस्पर्धामा भने नेपालले हार ब्यहोरेको थियो। नेपालले ६ खेलमा १४ गोल खाइसकेको छ।
यस्तो अवस्थामा साफ सुजुकी कप २०१८ अन्तर्गत सेमिफाइनलको खेलमा नेपालले बुधबार अपराह्न पौने ४ बजे माल्दिभ्ससँग प्रतिस्पर्धा गर्दैछ। बंगलादेशको बंगबन्धु राष्ट्रिय रंगशालामा हुने खेलमा माल्दिभ्सलाई पराजित गरेर पहिलो पटक फाइनल पुग्ने लक्ष्यमा केही बाधक छ भने त्यो इतिहास छ। जारी प्रतियोगितामा ३ खेलमा ७ गोल गरेको नेपालका लागि इतिहास रच्नुपर्ने अवस्था छ।
नेपालका प्रशिक्षक बालगोपाल महर्जन पनि इतिहास बनाउन खेल्ने बताउँछन्। मंगलबार भएको प्रिम्याच पत्रकार सम्मेलनमा महर्जनले भने,'भोलि माल्दिभ्सबिरुद्ध हुने सेमिफाइनलमा हामी नेपाली फुटबलका लागि ऐतिहासिक नतिजा निकाल्न सक्छौं।'
यता माल्दिभ्सका प्रशिक्षक पेटर सेगर्टले इतिहासले खेललाई कुनै फरक नपर्ने बताए। उनले नेपालबिरुद्ध जितका लागि खेल्ने बताए। 'दुई टिम भएका यसअघिका खेलमा कस्तो नतिजा आयो भन्ने मलाई मतलब छैन। हामी भोलि जितका लागि खेल्न मैदान उत्रनेछौं,' उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
