काठमाडौं– निर्वाचनमा धाँधली भएको भन्दै छुट्टै समान्तर समिति गठन गरेको आरके शर्मा नेतृत्वको गैरआवासीय नेपाली संघ (एनआरएनए) ले बद्रि केसी समूहले संघको कोष अपचलन गरेको आरोप लगाएको छ। मंगलबार काठमाडौंमा पत्रकार सम्मेलन गर्दै उक्त आरोप लगाएको हो।
१९ अक्टोबर २०२३ मा अनलाइन प्रणालीबाट गराइएको निर्वाचनमा योजनाबद्ध धाँधली गरिएका प्रमाणहरु पाइएको भन्दै उक्त निर्वाचन बदर हुनुपर्ने यो समूहको माग छ। तर सोहि दिन बनेको एक समझदारी विपरित गएर केसी समूहले आफूलाई अध्यक्ष रहेको घोषणा गरेका थिए।
काठमाडौँस्थित सोल्टी होटेलमा २० अक्टोबर २०२३ मा तत्कालिन तीनजना अध्यक्षहरु कुल आचार्य, रबिना थापा तथा बद्री केसीले हस्ताक्षर गरी महाधिवेशनको सम्पूर्ण कार्यक्रम तत्कालका लागि स्थगित गर्ने र निर्वाचनमा भएका अनियमितताको दुई साताभित्र छानबिन गर्न सहमत भएका थिए।
तर लगत्तै केसीले उक्त समझदारी तोडेका थिए। त्यसको विरोध गर्दै अर्को समूहले शर्माको नेतृत्वमा नयाँ कार्यसमिति गठन गरेको थियो। त्यसयता यी समूहबीच आरोप प्रत्यारोप चलिरहेको छ। त्यसैको निरन्तरता स्वरुप शर्मा समूहले केसी समूहले संघको आधिकारिक कोष कब्जा गरी अपचलन गरेको आरोप लगाएको हो।
‘महाधिवेशनको म्यान्डेट नपाएको अवैध समितिले संघको कोषबाट एकलौटी रुपमा अपचलन गर्ने तथा सचिवालयको दुरुपयोग गर्ने काम मान्य छैन। त्यस्तो काम तुरुन्त बन्द गर्न पनि हामी माग गर्दछौँ,’ पत्रकार सम्मेलनमार्फत शर्मा समूहले भन्यो।
यस्तै, उक्त धाँधलीको छानबिन गर्ने जिम्मा पाएको सीबीआइको प्रतिवेदनमा पनि सार्वजनिक गर्न माग गरिएको छ।
‘अनलाइन प्रणालीबाट गराइएको निर्वाचनको विषयमा नेपाल प्रहरीको केन्द्रीय अनुसन्धान ब्यूरो (सीबीआई) ले गरेको अनुसन्धानको रिपोर्ट हामीले आधिकारिक रुपमा पाएका छैनौं। तर संचारमाध्यमहरुमा प्रकाशित विवरणहरुका अनुसार निर्वाचन स्वच्छ तरिकाले हुन नसकेको थुप्रै प्रमाणहरु छन्,’ शर्मा समूहले दाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768563465.png)
-1768562733.png)
-1764146706.png)
-1768395492.png)
