काठमाडौंमा पुन: सुरु भयो द्रुत बस सेवा, अब ३/३ मिनेटको फरकमा बस छुट्ने

समाचार

नेपाल लाइभ आइतबार, मंसिर १०, २०८० ११:५०

काठमाडौं– काठमाडौंमा आज (आइतबार)देखि पुन: द्रुत बस सेवा सञ्चालनमा ल्याइएको छ। भौतिक पूर्वाधार तथा यातायात मन्त्रालयले भक्तपुरको सूर्यविनायकदेखि काठमाडौंको रत्नपार्कसम्म आइतबारदेखि पुन: द्रुत बस सेवा सञ्चालन गरिएको जनाएको छ।

पुन: द्रुत बस सेवा सञ्चालनका लागि ठाउँ–ठाउँमा बोर्ड राखिएको तथा सडकमा मार्किङ गरिएको (रातो रङ लगाइएको) छ। यस्तै, द्रुत सेवाका लागि ११ वटा बसहरु थप गरिएको छ।

भौतिक पूर्वाधार तथा यातायातमन्त्री प्रकाश ज्वालाले थप ११ वटा बससहित पहिलेभन्दा व्यवस्थित तरिकाले द्रुत बस सेवा पुनः सञ्चालनमा ल्याइने दाबी गरेका छन्।

यातायात व्यवस्था विभागका अनुसार आइतबारदेखि ३६ वटा द्रुत बस सञ्चालनमा आएका छन्। ती बस ३–३ मिनेटको फरकमा छुट्ने बताइएको छ। सडक विभागका महानिर्देशक सुशीलबाबु ढकालले बिहान र बेलुकी आवागमनको उच्च समय (पिक आवर) मा द्रुत बस कम भएको गुनासो आएकाले बसको सङ्ख्या थपेर चलाइएको बताए।

महानिर्देशक ढकालले द्रुत बस सेवा सञ्चालनका लागि यसअघि करिब ३ करोड रुपैयाँ खर्च भएको बताए। उनले अहिले पुनः सञ्चालनका लागि भएको खर्चबारे सार्वजनिक हुने बताए। द्रुत बस सेवा सञ्चालनको सम्पूर्ण जिम्मेवारी यातायात व्यवस्था विभागको रहेको उनले बताए।

काठमाडौं उपत्यकामा बढ्दो ट्राफिक जामका बीच सार्वजनिक सवारी प्रयोग गर्ने यात्रुलाई छिटो गन्तव्यमा पुग्न सजिलो होस् भन्ने उद्देश्यले गत असोज ३ गते, संविधान दिवसका दिनदेखि सूर्यविनायक–रत्नपार्क द्रुत बस सेवा सञ्चालनमा ल्याइएको थियो। तर दशैंदेखि भने उक्त सेवा स्थगित भएको थियो। दशैंमा यात्रुहरुको चाप कम भएको भन्दै द्रुत बस सेवा बन्द गरिएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

नयाँ अध्ययन: महिलामा क्यान्सरका घटना बढ्दै, पुरुषमा घट्दै

सरकार ढल्न लाग्यो भन्नु विपक्षीको छटपटी मात्र हो : उपमहासचिव ज्ञवाली

फुल कन्ट्याक्टमा नेपाललाई ६ स्वर्णसहित २५ पदक