काठमाडौं– उच्च अदालत पाटनमा चलिरहेको नक्कली भुटानी शरणार्थी ठगी प्रकरणको मुद्दाको सुनुवाइअन्तर्गत आइतबार २ जना पूर्वमन्त्री सहितका मुख्य अभियुक्तहरुको पक्षमा बहस हुने भएको छ।
उच्च अदालत पाटनका अनुसार पूर्व उपप्रधानमन्त्री तथा नेकपा एमालेका नेता टोपबहादुर रायमाझी, पूर्व गृहमन्त्री एवम् नेपाली कांग्रेसका नेता बालकृष्ण खाण, गिरोहका नाइके केशव दुलाल र टंक गुरुङको पक्षमा बहस गर्न उनीहरुका कानुन व्यवसायीलाई भनिएको छ। शुक्रबार भुटानी नेता टेकनाथ रिजालको तर्फबाट वहस सकिएपछि खाणका कानुन व्यवसायीलाई बहसका लागि समय दिइएको थियो।
थुनछेक बहसपछि मुद्दाको पुर्पक्षका लागि थुनामा पठाउने काठमाडौं जिल्ला अदालतको आदेशलाई चुनौती दिँदै पूर्वमन्त्रीद्वय रायमाझी र खाण तथा निलम्बित सचिव टेकनारायण पाण्डेसहितले उच्च अदालतमा पुनरावेदन निवेदन दर्ता गरेका थिए।
नेपाली नागरिकलाई भुटानी शरणार्थी बनाएर अमेरिका पठाइदिने भन्दै २ जना तत्कालीन मन्त्रीसहितको संलग्नतामा नेपाली नागरिकबाट ठूलो रकम उठाएर ठगी गरिएको प्रकरण सार्वजनिक भएको थियो।
जिल्ला अदालतका न्यायाधीश प्रेमप्रसाद न्यौपानेको इजलासले उनीहरुलाई पुर्पक्षका लागि थुनामा पठाउने आदेश गरेको थियो। जिल्लाले थुनामा पठाएपछि उक्त निर्णय बदर हुनुपर्ने मागसहित उनीहरु उच्च अदालत पुगेका थिए।
उच्चमा उनीहरुले जिल्लाको फैसला बदर गर्दै धरौटीमा रिहा गर्नुपर्ने माग गरेका छन्। यसअघि सबै निवेदकहरुको निवेदनलाई एकै साथ राखेर सुनुवाइ गर्न आदेश भएको थियो। उक्त आदेश अनुसार बिहीबार सबै निवेदनलाई एक साथ पेसी तोकिएको थियो।
नक्कली भुटानी शरणार्थी प्रकरणमा पुर्पक्षका लागि थुनामा रहेका निलम्बित सचिव पाण्डे, पूर्व सांसद आङटावा शेर्पासहितका प्रतिवादीले जिल्ला अदालत काठमाडौंको आदेशविरुद्ध दायर गरेको निवेदनको बिहीबार पेसी तोकिएको थियो।
आफूहरुलाई थुनामा पठाउने जिल्ला अदालत काठमाडौंको आदेश त्रुटिपूर्ण भएको दाबी गर्दै निलम्बित सचिव पाण्डे, नरेन्द्र केसी, सानु भण्डारी, आङटावा शेर्पा, इन्द्रजित राई, हरिभक्त मर्हजन, लक्ष्मी मर्हजन, सन्देश शर्मा, शमशेर मियाँ र गोविन्द चौधरीले रिट दायर गरेका थिए।
उनीहरुले आफूहरुलाई धरौटीमा वा साधारण तारेखमा रिहा गर्नुपर्नेमा पुर्पक्षका लागि थुनामा पठाउने निर्णय त्रुटिपूर्ण भएकाले बदर हुनुपर्ने माग गरेका छन्।
त्यसअघि उच्चमै पूर्व गृहमन्त्री खाण, पूर्व उपप्रधानमन्त्री रायमाझी, भुटानी नेता टेकनारायण रिजाल लगायतले दायर गरेका थिए। अब अर्को सुनुवाइमा उच्चले जिल्लाको आदेश बदर गर्ने कि सदर गर्नेबारे निर्णय सुनाउने छ।
उनीहरुको निवेदनमा यसअघि एकल इजलासले कैफियत प्रतिवेदन माग गर्ने आदेश गरिसकेको छ। उच्च पुगेका प्रतिवादीमध्ये लक्ष्मी मर्हजन धरौटीमा छुटेकी हुन् भने अन्य सबै प्रतिवादीहरु पुर्पक्षका लागि थुनामा गएका थिए। जिल्ला अदालत काठमाडौंले असार १ गते १६ जनालाई थुनामा पठाएको थियो भने २ जनालाई धरौटीमा रिहा गरेको थियो।
नक्कली भुटानी शरणार्थी प्रकरणमा संलग्न रहेको आरोपमा पक्राउ परेका पूर्व उपप्रधानमन्त्री रायमाझी, पूर्व गृहमन्त्री खाणसहित १८ जना र फरार रहेका ३० जनालाई संगठित अपराध, कीर्ते, ठगी तथा राज्यविरुद्धको आरोप गरी ४ वटा मुद्दा दायर भएको थियो।
उनीहरुसँग २७ करोड ५० लाख रुपैयाँ बिगो र कैद सजाय दाबी गर्दै जिल्ला अदालत काठमाडौंमा २०८० जेठ १० गते मुद्दा दायर गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
