काठमाडौं– साफ सुजुकी कप फुटबल प्रतियोगिताअन्तर्गत बुधबार हुने पहिलो सेमिफाइनलमा नेपालले माल्दिभ्ससँग प्रतिस्पर्धा गर्दैछ।
बंगलादेशको बंगबन्धु राष्ट्रिय रंगशालामा अपरान्ह पौने चार हुने खेल जित्न सके नेपाल प्रतियोगिताको पहिलो पटक फाइनलमा पुग्नेछ।
नेपाल समूह 'ए' को विजेताको रुपमा अन्तिम चारमा पुगेको हो। समूहको पहिलो खेलमा पाकिस्तानसँग २–१ ले पराजित भए पनि नेपालले त्यसपछि लगातार २ खेलमा जित निकाल्दै अघिल्लो चरणमा स्थान बनायो। दोस्रो खेलमा भुटानलाई ४–० ले हराएको नेपालले अन्तिम खेलमा बंगलादेशमाथि २–० को जित निकालेको थियो।।
यता माल्दिभ्स भने समूह 'बी' को उपविजेताको रुपमा अन्तिम चारमा पुगेको हो। जारी प्रतियोगितामा समूह चरणमा २ खेल खेलेको उसले पहिलो खेलमा श्रीलंकासँग गोलरहित बराबरी खेल्यो। दोस्रो खेलमा भारतसँग २–० गोलले पराजित भएपछि माल्दिभ्स् र श्रीलंकाको अंक र गोलअन्तर बराबरी भएको थियो। त्यसपछि टसको सहारा लिँदै माल्दिभ्सले सेमिफाइनलमा नेपालसँगको भेट पक्का गरेको हो।
भाग्यको साथ पाएर अन्तिम चारमा पुगेको माल्दिभ्स र नेपालबीच साफ च्याम्पियनसिपमा सातौं पटक प्रतिस्पर्धा हुन लागेको हो। यसअघि भएका ६ खेलमा नेपालले जित निकाल्न सकेको छैन। ६ मध्ये ४ खेलमा माल्दिभ्स विजयी भएको छ। पछिल्ला २ खेल बराबरीमा सकिएका छन्। साफ च्याम्पियनसिपमा माल्दिभ्सबिरुद्ध जितबिहीन नेपालका लागि पहिलो जित निकाल्ने अवसर छ।
नेपाल र माल्दिभ्सबीच समग्रमा साफ च्याम्पियनसिप, साग गेम्स, एएफसीका प्रतियोगिता र अन्तर्राष्ट्रिय मैत्रीपूर्ण खेल गरी कुल १५ प्रतिस्पर्धा भएको छ। जसमा नेपालले ४ खेलमा जित र ४ खेलमा बराबरी खेलेको छ। ७ खेलमा भने नेपाल पराजित भएको छ।
नेपालले माल्दिभ्सलाई सन् १९९९ देखि पराजित गर्न सकेको छैन। नेपालले पछिल्लो पटक सन् १९९९ को साग गेम्सको खेलमा माल्दिभ्सलाई २–१ गोलले हराएको थियो। त्यसपछि नेपालले १९ वर्ष माल्दिभ्सबिरुद्ध जित निकाल्न सकेको छैन।
साफ च्याम्पियनसिपमा नेपाल र माल्दिभ्स
सन् २०११– भारत
नेपाल १–१ माल्दिभ्स
सन् २००९ – बंगलादेश
नेपाल १–१ माल्दिभ्स
सन् २००८ – माल्दिभ्स
नेपाल १–४ माल्दिभ्स
सन् २००३ – बंगलादेश
नेपाल २–३ माल्दिभ्स
सन् १९९९– भारत
नेपाल २–३ माल्दिभ्स
नेपाल ०–२ माल्दिभ्स
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।