काठमाडौं– कल्याणकारी संस्था, हेल्प नेपाल नेटवर्कले पश्चिम नेपालमा गत शुक्रबार राति गएको भूकम्पमा परी प्रभावित परिवारहरुको सहयोगार्थ विश्वव्यापी सहयोग संकलन अभियान सुरु गरेको छ।
हेल्प नेपाल नेटवर्क नेपाल शाखाका अध्यक्ष अरुण सिंह बस्नेतले जाजरकोटको नलगाड नगरपालिकामा भूकम्प प्रभावित परिवारहरुका लागि १०० बोरा चामल, २०० टेन्ट तथा ३०० पिस कम्बल वितरण गरिसकेको बताए।
‘पश्चिम रुकुम र जाजरकोटबाट टेन्ट, औषधि, खाद्यान्न तथा जाडोका लागि न्यानो कपडाको माग आइरहेको छ। हामीसँग स्थानीय स्तरमा स्वयम्सेवी संस्था र स्वयंसेवकहरु हुनुहुन्छ। उहाँहरुको साथ र तपाईंहरुको सहयोगबाट भूकम्प पीडित समुदायलाई सहयोग वितरण जारी राख्ने छौं,’ उनले भने।
यसैगरी हेल्प नेपाल नेटवर्क अमेरिकाका अध्यक्ष ज्वलन्त श्रेष्ठले पश्चिम नेपालका भूकम्प प्रभावितहरुलाई मन खोलेर सहयोग गर्न अमेरिका तथा संसारभरी रहेका प्रवासी नेपालीहरुलाई आग्रह गरे।
‘महाभूकम्प होस् वा कोभिड महामारी, हेल्प नेपालले विगतमा तपाईंहरुको सहयोगलाई पीडित परिवारसम्म पुर्याउँदै आएको छ। यसपटक पनि भूकम्प पीडित परिवारहरुलाई तत्काल आपतकालीन, मानवीय सहायता पुर्याउन तपाईंहरुको अमूल्य सहयोगका लागि हामी अपिल गर्दछौं,’ उनले भने।
हेल्प नेपाल नेटवर्क युकेका अध्यक्ष सचिन श्रेष्ठले सबै प्रवासी नेपालीहरुलाई भूकम्प पीडितहरुका लागि सक्दो सहयोग गर्न आग्रह गरे। ‘एउटा अक्षय कोषबाट प्राप्त ब्याजले हेल्प नेपालको प्रशासनिक खर्च सञ्चालन हुन्छ। त्यसैले तपाईंहरुले सहयोग गर्नुभएको एक पेनी पनि प्रशासनिक काममा खर्च हुँदैन, सिधैं भूकम्प पीडितसम्म हामीले पुर्याउँछौं’, उनले भने।
उनले प्रवासमा रहेका सामाजिक संघसंस्थासंग सहकार्य गर्न हेल्प नेपाल नेटवर्क तयार रहेको पनि बताए।
सक्दो सहयोग गर्न आग्रह
निम्न लिंकहरुमा गएर सक्दो सहयोग गर्न हेल्प नेपाल नेटवर्कले सबै प्रवासी नेपालीहरु तथा नेपालका मित्रहरुलाई आग्रह गरेको छ ।
अमेरिका तथा क्यानडा
https://www.gofundme.com/f/nepal-earthquake-relief-appeal-2023
अष्ट्रेलिया
https://www.gofundme.com/f/fund-raise-to-support-jajarkot-earthquake?member=30436025&sharetype=teams&utm_campaign=p_na+share-sheet&utm_medium=copy_link&utm_source=customer
युके
https://www.justgiving.com/page/nepal-earthquake-appeal-2023
सन् २०१५ मा गएको महाभूकम्प पछि संसार भरिका नेपालीहरुको सहयोगबाट हेल्प नेपाल नेटवर्कले झन्डै ६ हजार परिवारलाई आपतकालीन राहत वितरण गरेको थियो भने ६ ओटा अस्थायी स्वास्थ्य चौकीको निर्माण तथा ६ ओटा विद्यालयहरुको पुनर्निर्माणमा सघाएको थियो।
त्यस्तै स्वास्थ्य शिविरहरु पनि सञ्चालन गरेको थियो। हालै बझाङका भूकम्प पीडितहरुका लागि पनि नेटवर्कले राहत सामग्री वितरण गरेको थियो।
‘मातृभूमिको लागि महिनामा एक पौण्ड वा एक डलर’ भन्ने नारा दिएर सन् १९९९ मा बेलायतमा स्थापना गरिएको नेटवर्क (www.helpnepal.net) ले नेपालमा शिक्षा, स्वास्थ्य, आपत्कालीन मानवीय सहायता लगायतका क्षेत्रमा सहयोग पुर्याउँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768291693.png)
-1768288990.png)
-1764146706.png)
