प्रतिकात्मक तस्बिर
काठमाडौं– नेपाल प्रहरीका प्रहरी सहायक निरीक्षक (असई), सहायक हवल्दार र जवान समेतको मिलेमतोमा डाँकाचोरी भएको छ। संघीय राजधानीमै असई समेतको संलग्नतामा डाँकाचोरी भएको हो।
डाँकाचोरी प्रकरणमा ३ प्रहरीसहित ५ जनालाई प्रतिवादी बनाएर जिल्ला अदालत काठमाडौंमा मुद्दा दर्ता गरिएको छ। प्रहरी वृत्त महाराञगञ्जमा कार्यरत असई ४३ वर्षीय सुनबहादुर तामाङ, ३३ वर्षीय सहायक हवल्दार खगराज अधिकारी, २२ वर्षीय जवान भुवन बरालसहित सुनसरीको तरहरा घर भइ काठमाडौं बस्दै आएका २८ वर्षीय मदन पुरी र सोही ठाउँका २५ वर्षीय सन्तोष पुरीलाई प्रतिवादी बनाएर मुद्दा चलाइएको छ।
उनीहरुविरुद्धको मुद्दा जिल्ला अदालत काठमाडौंका न्यायाधीश कपिलमणि गौतमको इजलासमा सुनुवाइ भइरहेको छ। थुनछेक बहस सकिएपछि पुर्पक्षमा थुनामा पठाउने वा धरौटी तथा साधारण तारेखमा रिहा हुने भन्ने आदेश आउने छ।
माथि नाम उल्लेखित पाँच जनाविरुद्ध कुमार रोकाले प्रहरीमा जाहेरी दिएका थिए। असोज २१ गते राति उनी ठमेलबाट बालुवाटार जान लागेका थिए। सोही बेला ३ जना महिलाले लिफ्ट मागेकाले आफूले उनीहरुलाई लिफ्ट दिएको रोकाको जाहेरीमा उल्लेख छ।
रोका र उनका साथी नवराज नगरकोटी छुट्टा–छुट्टै कार चलाएर ठमेलबाट बालुवाटारतर्फ गइरहेका थिए। रोकाका अर्का साथी पनि सँगै, कारको अगाडिको सिटमा सवार थिए।
ठमेलबाट पानीपोखरी पुग्दा, रातिको करिब साढे ११ बजेको थियो। त्यतिबेला हाल प्रतिवादी बनाइएका सन्तोष पुरीले दुबै कारलाई रोकेको थिए। त्यसपछि पुरीले ‘यी केटीहरुलाई कहाँ बेच्न हिँडेको?’ भन्दै प्रश्न गरेका थिए। त्यसपछि उनीहरु सबैलाई कारबाट उतारेर ड्युटीमा रहेका असई सुनबहादुरले प्रहरी भ्यानमा राखेर त्रिवि शिक्षण अस्पताल हुँदै निर्मल निवासको गल्लीतर्फ लगेको रोकाको भनाइ छ।
निर्मल निवासको गल्लीमा पुर्याएपछि कुटपिट गर्दै आफ्नो साथमा भएको साढे १७ हजार रुपैयाँ लुटपाट गर्नुका साथै असई तामाङसहितको टोलीले डेढ लाख रकम माग गरेको थियो। त्यसपछि ई–सेवामार्फत् थप २५ हजार रुपैयाँ ट्रान्सफर गर्न लगाएर साढे ४७ हजार रुपैयाँ असई तामाङसहितको टोलीले डाँकाचोरी गरेको रोकाले जाहेरीमा उल्लेख गरेका छन्।
आफू लुटिएपछि तत्कालै रोकाले प्रहरी कन्ट्रोल १०० मा फोन गरी घटनाबारे जानकारी गराएका थिए। असोज २३ गते जिल्ला प्रहरी परिसर काठमाडौंले उनीहरुलाई पक्राउ गरी अनुसन्धान गरेको थियो।
अनुसन्धानका क्रममा समेत डाँकाचोरी गरेको देखिएपछि उनीहरुलाई मुद्दा चलाइएको प्रहरीले जनाएको छ।
अनुसन्धानको क्रममा कुमार नगरकोटीले केटीहरुसँग सम्पर्क गरी ग्राहकसम्म पुर्याउने काम गर्ने गरेका थिए। यस्तै, पुरी द्वयले पनि नगरकोटीलाई केटी ल्याउन भनेर काम लगाएको, लुटपाटको योजना बनाएर प्रहरीको सहयोगमा लुटपाग गरेको खुलेको एक अनुसन्धान अधिकृतले बताए।
पुरीकै योजनामा नगरकोटी र रोकाले कारमा केटी राखेर ल्याएपछि कहाँ बेच्न हिँडेको भन्दै प्रहरी भ्यानमा राखेर डरधम्की दिँदै लुटपाट गरिएको प्रहरी अनुसन्धानबाट खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
