काठमाडौं– बिहीबार एक ग्राहक कुलेश्वरको एक खाद्य पसलमा पुगे। उनले त्यस पसलका व्यापारीसँग सोध्दै भने, ‘साहुजी चिनी छ?’
‘हामीले चिनी नबेचेको एक महिना नाघ्यो। यहाँ पाउँदैन,’ ती व्यापारीले भने।
‘कुलेश्वरका सबै पसलमा चिनी पाउँछ भन्ने सुनेर आएको पाउँदैन र?,’ ती ग्राहकले भने।
‘त्यो बन्द सटर रहेको पसलले चाँहि हिजोदेखि बेच्न थालेको छ। त्यो पनि खुद्रा व्यापार संघले बिक्री गर्न दिएको हो रे। हिजो लाइन लगाएर ११५ रुपैयाँ केजीले एक जना बराबर १ केजी बिक्री गरिरहेको थियो। १० बजे पछि पसल खुल्छ त्यतिबेला आउनुस् न,’ ती व्यापारीले भने।
त्यसपछि ती ग्राहक हुन्छ भन्ने प्रतिक्रिया जनाउँदै अर्को पसलमा गएर सोधे। अर्को पसलको पनि जवाफ उस्तै थियो। बिहानभरी कुलेश्वरका सबै पसल चहार्दा पनि एक किलो चिनी पाउन नसकेर थकित हुँदै आफ्नो बाटो लागे।
तर वाणिज्य तथा उपभोक्ता संरक्षण विभागका महानिर्देशक तीर्थराज चिलुवाल बजारमा चिनी अभावको समस्या नरहेको बताउँछन्।
बिहीबारदेखि बजारमा चिनी अभाव नहुने तर उच्च गुणस्तरको चिनी भएकाले थोरै महंगो पर्ने उनको भनाइ छ।
बजारमा चिनीको अभाव भइरहेका बेला केही साताअघि अद्योगसँग १ लाख २८ हजार टन चिनी फेला परेको थियो। सो चिनी उद्योगीले कोक पेप्सी कम्पनीलाई बिक्री गरिसकेको बताएका थिए। सो चिनीमध्ये तत्काल बजार पठाउन विभाग र उद्योग मन्त्रालयले छलफल गरिरहेको थियो।
उक्त चिनी व्यापारीलाई सिधै ल्याएर बिक्री गर्न आग्रह गरेको तर व्यापारीहरुले अत्यधिक फाइदा लिन नपाउने भएकाले खरिद गरि बिक्री गर्न नमानेको उनी बताउँछन्।
त्यसपछि विभागले काठमाडौं उपत्यकाका तीनवटै खुद्रा व्यापार संघसँग समन्वय गरेर बजारमा चिनी पठाउने तयारी गर्यो। संघले उद्योगीसँग एक हजार मेट्रिक टन चिनी खरिद गरी बजारमा पठाउन थालिसकेको छ।
बुधबारमात्रै ४ ट्रक चिनी ल्याएर खुद्रा व्यापार संघले बिक्री थालेको छ। उक्त चिनी बिहीबार १० ट्रक उपत्यकामा आइपुग्ने चिलुवाल बताउँछन्। तर चिनी पर्याप्त हुँदा हुँदै बजारमा नपुग्नु व्यापारीहरुको कमजोरी रहेको बताए।
‘हिजोको एक ट्रक चिनी बिक्री भएन भन्ने मैले सुनेको छु। बजारमा चिनी अभाव नहुनु पर्ने हो। तर यो संघले खरिद गरेको चिनी उच्च गुणस्तरको भएकाले महंगो पर्ने र व्यापारीले फाइदा नराखी बिक्री गर्नुपर्ने भएकाले खुद्रा व्यापारीहरुले चिनी नकिनेको हुनसक्छ,’ चिलुवालले भने।
संघले ल्याएको चिनीको मूल्य, ढुवानी खर्च, बीमा, प्याकेजिङ र भाडा जोड्दा प्रतिकिलो १११ रुपैयाँ ८५ पैसा खर्च हुँदा खुद्रा व्यापारीलाई ११४ रुपैयाँ पर्ने र खुद्रा व्यापारीहरुले उपभोक्तालाई ११५ रुपैयाँमा बिक्री गर्नुपर्दा व्यापारीले चासो नराखेको हुनसक्ने उनले बताए।
खुद्रा व्यापार संघका अध्यक्ष नरेशबाबु शाहीले संघमा आबद्ध सदस्य व्यापारीहरुलाई मात्र चिनी दिएकाले बजारमा अभाव भएको बताए।
‘हामीले जो पायो त्यही व्यापारीलाई चिनी दिएका छैनौं। संघमा आबद्ध रहेका पदाधिकारीहरुलाई मात्र बिक्रीका लागि चिनी दिएका छौं। जो पायो त्यहीलाई दियो भने मौका छोप्छन् र चिनी लुकाएर बजारमा फेरि अभाव गराउन सक्छन्,’ उनले भने।
यस्तै संघले चिनी ल्याउँदा प्रतिकिलो १११ रुपैयाँ ८० पैसा पुगेको र लोडअनलोड खर्च जोडेर व्यापारीलाई प्रतिकिलो ११४ रुपैयाँमा बिक्री गर्ने र व्यापारीले १ रुपैयाँ मात्र नाफा राखेर बिक्री गर्ने गरी चिनी वितरण गरेको शाहीको भनाइ छ।
बुधबार संघले ल्याएको ४ ट्रकमध्ये एक ट्रकको ३८० बोरा चिनी बिक्री भएको उनले बताए। जसमध्ये कीर्तिपुरका पसलहरुले ६० बोरा, नक्साल क्षेत्रका पसलहरुले ६६ बोरा, क्षेत्रपाटीका पसलले ६० , बानेश्वरका पसलले ६० बोरालगायत लाजिम्पाट, स्वयम्भू क्षेत्रका पसलले चिनी खरिद गरी लगेको उनले जानकारी दिए।
बिहीबार पनि संघमा आबद्ध सदस्यहरुका पसलहरुले चिनी खरिद गरिरहेको उनले बताए। अब भने बजारमा चिनीको अभाव नहुने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
