काठमाडौं– ललितपुरमाको एकान्तकुनारमा रहेको यातायात व्यवस्था कार्यालयबाट पनि अब सवारी चालक अनुमतिपत्रको नवीकरण, वर्ग थप र राजश्व भुक्तानी अनलाइनबाटै हुने भएको छ।
बिहीबारदेखि उक्त सेवा सञ्चालनमा आएको हो। भौतिक पूर्वाधार तथा यातायातमन्त्री प्रकाश ज्वालाले अनलाइन सेवा प्रणालीको विस्तार कार्यक्रमलाई सम्बोधन गर्दै अनलाइन सेवा देशव्यापी बनाउनुपर्ने बताएका छन्।
उनले लाइसेन्स, राजश्व बुझाउन कार्यालयमा जानुपर्दैन, लाइन लाग्नुपर्दैन भन्ने कुराको सुनिश्चितता दिनुपर्ने आवश्यकता रहेको बताए। उनले तीन तहका सरकारको बीचमा समन्वय, सहकार्य र सहअस्तित्वको सिद्धान्तअनुसार अघि बढे कुनै पनि काममा सफल भइने दाबी गरे।
जनतालाई झन्झटभुक्त रुपमा सहज रुपमा सेवा दिनुपर्ने अहिलेको आवश्यकता भएको उनको भनाइ थियो। उनले जनताले पाएको सास्ती, विचल्ली देखेर बिचौलियाहरुले यातायात कार्यालयहरुमा सेवाग्राहीलाई शोषण गरिरहेको बताए।
छिटो छरितो र नम्र भएर कर्मचारीहरुले काम गर्ने हो भने बिचौलियाहरु निषेधित हुँदै जाने उनको भनाइ थियो। उनले सेवाग्राहीको पहुँच कर्मचरीसँग नहुने तर बचौलियाको पहुँच कर्मचारीसँग हुनु नै समस्याको जड रहेको बताए।
कार्यक्रममा बोल्दै नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सटौलाले सडकका खाल्डाखुल्डी पुर्ने काममा सरकारले ढिलासुस्ती गरिरहेको बताए।
नारायणगढ–मुग्लिन लगायतका सडकखण्डमा अझै सडकहरुका खाल्डाखुल्डी पुर्न सरकारी पक्षबाट ढिलासुस्ती भइरहेको भन्दै सडक सुरक्षित नभएसम्म दशैंतिहार जस्ता चाडवाडमा समयमै र सहज रुपमा यात्रुहरुलाई गन्तव्यमा लैजान कठिन हुने बताए।
बिहीबार बिहान यातायात व्यवस्था कार्यालय बागमती प्रदेशको एकान्तकुनाबाट सवारी चालक अनुमतिपत्रको नवीकरण, वर्ग थप र राजश्व भुक्तानीको अनलाइन सेवा सञ्चालन भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
