इजरायलमा स्वदेश फिर्तीको पर्खाइमा रहेका नेपालीहरु
काठमाडौं– युद्धग्रस्त इजरायलमा रहेका नेपाली नागरिकलाई स्वदेश फिर्ता ल्याउन केही समय लाग्ने देखिएको छ। इजरायलमा रहेकामध्ये ३५० नेपालीले स्वदेश फिर्ताका लागि आवेदन दिए पनि उनीहरुलाई उद्धार गर्न भने समय लाग्ने देखिएको हो।
प्यालेस्टिनी लडाकु समूह हमासको आक्रमणमा परी ज्यान गुमाएका १० जना नेपालीको शव ल्याउन पनि केही दिन लाग्ने देखिएको छ। मंगलबार मात्रै परराष्ट्रमन्त्री एनपी साउदले इजरायलका विदेशमन्त्री एली कोहेनसँग टेलिफोन वार्ता गरेका थिए। इजरायली समकक्षी कोहेनसँग परराष्ट्रमन्त्री साउदले १० जना नेपालीको शव नेपाल ल्याउने र त्यहाँबाट स्वदेश फर्किन चाहने नेपालीको उद्धार गर्ने विषयमा कुराकानी गरेका थिए।
शव फिर्ताका लागि इजरायली पक्षले केही प्रक्रिया पुरा गर्नुपर्ने बताएको छ। विदेशमन्त्री कोहेनले प्रक्रिया पूरा गरेपछि शव फिर्ता हुने जवाफ दिएको परराष्ट्रमन्त्री साउदनिकट स्रोतले जानकारी दिएको छ।
इजरायलस्थित नेपाली दूताबासले स्वदेश फर्किन चाहने नेपालीको आवेदन लिइरहेको छ। जसअनुसार मंगलबार साँझसम्म ३५० जनाले आवेदन दिएका छन्।
सरकारले इजरायलबाट नेपालीको उद्धारका लागि जहाज तयारी अवस्थामा राखेको बताएको छ। तर इजरायलमा युद्ध जारी रहेका कारण त्यहाँको विमानस्थलमा अवतरणको अनुमति मिलेको छैन।
‘इजरायलमा अझै युद्ध जारी छ। दुवै पक्षबाट आक्रमणहरु भइरहेका छन्। जसकारण त्यहाँ जहाज अवतरण गर्न सक्ने अवस्था नरहेको भन्ने जवाफ इजरायली पक्षबाट आइरहेको छ,’ परराष्ट्र मन्त्रालयका १ जना अधिकारीले भने, ‘हामीले जहाज तयारी अवस्थामा राखेका छौं। तर उताबाट अवतरणको अनुमति पाउन भने समय लाग्ने देखिएको छ।’
इजरायलस्थित नेपाली दूतावासले सुरक्षा संवेदनशीलताका हिसाबले जोखिमपूर्ण क्षेत्रमा रहेका १२७ जना नेपालीको उद्धार गरिएको जनाएको छ। इजरायली सुरक्षा बलको मद्दतमा दक्षिणी क्षेत्र किबुजबाट ५५ जना र उत्तरी सीमाबाट ७२ जनाको उद्धार गरिएको सुरक्षित स्थानमा राखिएको दूतावासले जनाएको छ।
इजरायलस्थित नेपाली दूतावासले हमासको आक्रमणबाट घाइते भएका ४ जना नेपाली विद्यार्थीको स्वास्थ्यमा सुधार भइरहेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1764146706.png)
-1763721444.png)
-1765273665.jpg)
