समाज

शोकमा सुदूरपश्चिम

शेरबहादुर ऐर सोमबार, असोज २२, २०८० २०:३३

धनगढी– कैलालीको घोडाघोडी नगरपालिका-४ स्थित हरिकृष्ण न्याैपानेको घरमा पुग्दा उनी बेहोस अवस्थामा ढलिरहेका थिए। घर भित्र र बाहिर आफन्त र छरछिमेकीको क्रन्दन सुनिन्थ्यो। विछिप्त थिइन् सीता न्याैपाने। इजरायलको मध्य र दक्षिण क्षेत्रमा शनिबार प्यालेस्टाइनको हमास समूहले गरेको आतंककारी हमलामा छोरा नारायणप्रसाद मारिएको खबर सामाजिक सञ्जालभरि छरपस्ट भए पनि उनलाई उनी छोराले फोन गरिहाल्छ कि भन्ने पर्खाइमै थिइन्।

खबरले छाती निचोरिए पनि मसिनो आशा पालेर उनी भन्छिन्, ‘छोरा मारिएको खबर त सुनेँ। तर विश्वास छैन। ती १० जना नै फर्किएर आउँछन्।’ एक्कासी परदेशमा रहेको छोरा मारिएको खबर सुन्दा उनी विश्वस्त छैनन्। विक्षिप्त उनको मनले छोरा अब यो संसारमा छैन भन्ने पत्याउन सकिरहेको छैन। एकैछिनमा छोराले फोन गर्छ कि भन्ने आशा उनमा छ।

‘लर्न एन्ड अर्न’ कार्यक्रम अन्तर्गत इन्टर्नसिपमा अध्ययन गर्न करिब एक महिनाअघि नारायणप्रसाद इजरायल गएका थिए । पढाइका लागि लिएको ऋण तिरेर पक्की घर बनाउने सपनासहित उनी इजरायल गएका थिए। ‘पढ्दै कमाउँदै नयाँ घर बनाउँछु भन्थ्यो,’ केही दिनअघि मात्रै छोराले फोनमा भनेको सम्झिँदै उनी भक्कानिइन्, ‘घर बनाउन दाजुसँग पैसा माग्नुहोस्, नत्र म पठाउँला, ढुङ्गा झार्दै गर्नुहोला भनेथ्यो।’ उनले एकाएक छोरा मरेको कुरा विश्वास गर्न सकिरहेकी छैनन् ।

नारायणप्रसाद इजरायल जानका लागि भदौ २० गते घरबाट निस्किएका थिए। काठमाडौं पुगेर भदौ २५ गते राति १२ बजे फ्लाइट रहेको र दु:खका दिन गएको सम्झिइन्। ‘त्यहाँ पुुगेपछि काम सुरु गरेको सुनाएको थियो,’ उनले भनिन्, ‘घरका हामी सबै काम देखेर खुशी भएका थियौँ। तर, अचानक...’

जेठा दाजु धर्मराज भाइलाई पढाउनुपर्छ भनेर १० वर्षदखि भारतको बैँगलोरमा काम गरिरहेका छन्। नारायणप्रसादलाई पढाउन भनेर उनी मजदुरी गर्न भारत गएका थिए। कान्छा ाभाइ १२ वर्षका भए। मृत्यु हुने नारायणप्रसाद भर्खरै २२ वर्ष पुग्दै थिए। आमा सीताले भनिन्, ‘धर्मराज आफूले नपढे पनि भाइलाई पढाउछु भनेर भारतमा काम गर्न गएको थियो।’

नारायणका बुवा अशक्त छन् । घरमा आर्थिक अवस्था राम्रो नभएको सीताले सुनाइन्। छोराले यसरी एक्कासी छोडेर जाँदा आफ्नो साहारा नै टुटेको आमा सीता बताउँछिन्।

प्यालेस्टिनको हमास समूहको आक्रमणबाट १० जना नेपालीको मृत्यु भएको थियो। आइतबार साँझ इजरायलस्थित नेपाली दूतावासले उनीहरुको मृत्युु भएको पुष्टि गरेको थियो। जसमा मारिनेमा सात जना सुदूरपश्चिमका रहेका छन्। अहिले सिंगो मुुलुकसंगै सुदूरपश्चिम पनि रोइरहेको छ। यहाँको अवस्था अहिले निकै फरक बनेको छ।

छोराहरु गुमाएका आमाबुबाहरु अहिले विक्षिप्त छन्।

इजरायलमा मारिने कैलालीकै अर्का व्यक्ति हुन् आशिष चौधरी। कैलालीको जोशीपुर गाउँपालिका वडा नम्बर ५ का ७० वर्षीय कन्हैयालाल चौधरीको कानमा नाति इजरायल उड्नुअघि नातिसँग भएको फोन संवाद गुन्जिरहन्छ। उनी भन्छन्, ‘फोनमा बाजे केहीबेरमा उड्दैछु, तपाईंहरु राम्रोसँग बस्नुहोला भनेको थियो।’ तर नातिको मृत्यु भएको खबर सुनेर उनी शोकमा डुबेका छन्।

गाजा र इजरायलबीचको युद्ध सुरु भएपछि त्यहाँ रहेका नेपालीहरू अलपत्र परेका छन्। कञ्चनपुरका विपिन जोशी सम्पर्कविहीन भएपछि उनको परिवारमा चिन्ता बढेको छ। भीमदत्त नगरपालिका वडा नम्बर ३ नागार्जुनमा विपिनको परिवारमा चिन्ता बढेको छ। शनिबारपछि छोरासँग सम्पर्क नभएकाले आमा पद्मा सुर्ताएकी छिन्। ‘छोरासँग सम्पर्क नभएको दुई दिन भइसक्यो, ऊ कस्तो अवस्थामा छ केही थाहा छैन,’ पद्माले भनिन्। छोराको चाँडै उद्धार गरिदिन उनले अनुनय गरिन्।

इजरायल आक्रमणमा मृत्यु हुनेमा कैलाली घोडाघोडी नगरपालिका ४ का नारायणप्रसाद न्यौपाने, कैलालीकै बौनिया ३ का आशिष चौधरी, डोटी पचनली ३ का राजन फुलारा, डोटीकै लमिखाल ८ का पदम थापा, दार्चुला लेकम ५ का दीपेशराज विष्ट, दार्चुला मालिकार्जुन ४ का लोकेन्द्रसिंह धामी, बझाङ जयपृथ्वी ६ का गणेशकुमार नेपाली रहेका छन्।

यस्तै धनुषा सपाही ६ का आनन्द साह, सुनसरी मधुवन १ का राजेशकुमार स्वर्णकार र सल्यान सारदा ३ का प्रवेश भण्डारी रहेका छन् भने अन्य चार जना अस्पतालमा उपचाररत छन् । घाइतेहरूमा सल्यान सारदा २ का विधान सेजवाल, दाङ दङ्गिशरण वडा नम्बर ३ का प्रवीण डाँगी, कैलाली टीकापुर ९ का धनबहादुर चौधरी, गोरखा ८ गोर्खाका हिमान्चल कट्टेल र कंचनपुर भीमदत्त ३ का विपिन जोशी छन्।

इजरायलमा सिक्दै कमाउँदै कार्यक्रमअन्तर्गत कुल २ सय ६५ विद्यार्थी इजरायल गएका छन्।

उद्धारको माग गर्दै अभिभावकसहित विद्यार्थीहरुले निकाले मौन र्‍याली
इजरायलको युद्धग्रस्त क्षेत्रमा फसेका नेपालीको तत्काल उद्धार गर्न माग गर्दै टीकापुरमा सुदूरपश्चिम विश्वविद्यालयका विद्यार्थीले मौन र्‍याली निकालेका छन्। हाल इजरायलमा रहेका निश्चल पाण्डेका बुबा उत्तम पाण्डेले आफू लगायतका सयौं परिवार छोराछोरी संकटमा परेको खबर सुनेपछि छटपटी भएको बताए। उनले तत्काल उद्धार गर्न सरकारसँग माग गरे।

अर्का विद्यार्थी सुष्मा रेग्मीका बुबा डिल्लीरमण रेग्मीले आफ्नी छोरीलगायतका चार जनाले खान पाएको तर बंकरमा बसिरहेका खबर प्राप्त भएको जानकारी दिए। उनीहरू आत्तिरहेकाले छिटो घर फर्काउन सरकारसँग उनले अनुरोध गरे।

सुदूरपश्चिम विश्वविद्यालय कृषि विज्ञान संकायका उपप्राध्यापक आशिष घिमिरेले अरु देशका सरकारले आफ्ना नागरिकलाई सुरक्षित स्थानतर्फ लगिसके पनि हाम्रो सरकारले अहिलेसम्म पनि ‘पहल गर्दैछु’ मात्र भनिरहेकाले भन्दै आक्रोश व्यक्त गरे। उनले शीघ्र विद्यार्थीको उद्धारमा सरकार लाग्नुपर्ने बताए।