काठमाडौं- साफ च्याम्पियनसिपअन्तर्गत आज अपराह्न बङ्गलादेशको ढाकास्थित बङगबन्धु रङ्गशालामा नेपाल बंगलादेशसँग भिड्दैछ। समूह चरणको यो अन्तिम खेल जित्न सके नेपाल सेमिफाइनलमा प्रवेश गर्नेछ।
पहिलो खेल गुमाए पनि दोस्रो खेलमा उत्कृष्ट पुनरागमन गरेको नेपालका लागि आजको खेल अग्निपरीक्षा बराबर हो। जारी प्रतियोगितामा बङ्गलादेशले तीन गोल गरेको छ भने एक गोल पनि खाएको छैन। नेपालले भने पाँच गोल गर्दा दुई गोल खाएको छ। यसरी हेर्दा बङ्गलादेशविरुद्ध गोल गर्न निकै कठिन देखिन्छ।
नेपाली राष्ट्रिय फुटबल टोलीका कप्तान विराज महर्जनले बङ्गलादेश विरुद्धको खेल नेपालले जित्नै पर्ने बताएका छन्। कप्तान महर्जनले साफ च्याम्पियनसीप अन्तर्गत समूह चरणको तेस्रो खेल खेलाडीका लागि मात्र नभएर सम्पूर्ण नेपालीका लागि महत्वपूर्ण रहेको बताएका छन्।
बिहीबार भएको समूह ‘ए’ को दोस्रो चरणको खेलमा नेपालले भुटानलाई ४–० को फराकिलो अन्तरले पराजित गरेको थियो। समूहकै अर्को खेलमा आयोजक बङ्गलादेशले पाकिस्तानलाई १–० ले पराजित गरेपछि नेपालको सेमिफाइनल पुग्ने सम्भावना नेपालकै खेलमा निर्भर रहनेछ।
दोस्रो चरणको खेल सकिँदा अङ्क तालिकामा बङ्गलादेश दुई खेलमा ६ अङ्क बटुल्दै शीर्ष स्थानमा रहेको छ। दोस्रो स्थानमा पाकिस्तान दुई खेलमा तीन अङ्क लिएर बसेको छ। नेपालले दुई खेलमा एकमा हार र एकमा जित निकाल्दै तीन अङ्कसाथ समूहको तेस्रो स्थानमा छ।
समूहको पुछारमा रहेको भुटानले दुई खेलमा कुनै अङ्क जोडेको छैन। भुटान समूह चरणबाटै बाहिरिसकेको छ। नेपाललाई सेमिफाइनलमा पुग्न पहिलो विकल्प बङ्गलादेश विरुद्ध स्पष्ट जीत हासिल गर्नु पर्नेछ।
शनिबार पहिलो खेलमा पाकिस्तान र भुटानबीचको विजेताले पनि नेपालको अघिल्लो चरणको यात्रा तय गर्नेछ।
भुटान र पाकिस्तानको खेल बराबरी अथवा भुटानले जितेको अवस्थामा नेपालले बङ्गलादेशविरुद्ध बराबरी खेले मात्र पनि समूह उपविजेता बन्दै सेमिफाइनलमा प्रवेश गर्नेछ। यदि अर्को खेलमा पाकिस्तानले जिते नेपाललले बङ्गलादेशविरुद्ध जीत निकाल्नैपर्ने हुन्छ। यदि शनिबार हुने पहिलो खेलमा पाकिस्तानले भुटानलाई पराजित गर्यो र नेपाल बङ्गलादेशसँग हार्यो भने पाकिस्तान र बङ्गलादेश सेमिफाइनल पुग्नेछन्। नेपाल समूह चरणबाटै घर फर्कनुपर्नेछ।
समग्रमा बङ्गलादेशलाई बराबरी अथवा जितले अर्को चरणमा पुग्न सहज देखिन्छ। नेपालले पनि जित दर्ता गरे अर्को चरण पुग्ने पक्का छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।