‘ई’ र काठमाडौं महानगरबीच ४ बुँदै सहमति, फुटपाथ व्यवसायीको ‘व्यवस्थापन’ गरिने

राजनीति

नेपाल लाइभ बुधबार, असोज १०, २०८० २१:४५

काठमाडौं– काठमाडौंका फुटपाथ तथा सडक व्यवसायीको व्यवस्थापनको माग राख्दै आन्दोलनमा रहेका अभियन्ता ‘ई’ र काठमाडौं महानगरपालिकाबीच ४ बुँदे सहमति भएको छ।

बुधबार भएको ४ बुँदे सहमतिमा महानगरपालिकाले फुटपाथ तथा सडक व्यवसायीबाट जफत गरेका सामानहरु महानगरपालिकाको स्टोरमा भएसम्म यकिन गरी सम्बन्धित सामानका धनीलाई फिर्ता गर्ने भनिएको छ।

यस्तै, अनौपचारिक क्षेत्रमार्फत् हुने व्यापार व्यवसायलाई व्यवस्थित गर्ने स्थल, समय, व्यापार गर्न आवश्यक मानिने व्यक्ति यकिन गर्न र स्थान उपलब्ध गराउने विधि, प्रक्रिया तथा कानुनी व्यवस्था समेतको प्रबन्ध गर्नुपर्ने विषयमा ठोस सुझावसहित अध्ययन गरी २ महिनाभित्र प्रतिवेदन पेस गर्न समिति गठन गर्ने सहमति भएको छ।

समितिमा महानगरले तोकेका ३ जना, अभियन्ता ‘ई’का तर्फबाट तोकिएका प्रतिनिधि २ जना, भौतिक पूर्वाधार तथा यातायात मन्त्रालयका प्रतिनिधि १ जना, शहरी विकास मन्त्रालयका प्रतिनिधि १ जना र ट्राफिक प्रहरीका प्रतिनिति १ जना रहने उल्लेख गरिएको छ।

साविक फुटपाट, सार्वजनिक स्थलमा व्यापार गरेका व्यवसायीहरुका लागि महानगरपालिका भित्र कानुनले निषेध गरेका स्थान बाहेक अन्यत्रका उपयुक्त स्थलहरु पहिचान गर्न महानगरपालिकाले बुधबारदेखि नै पहल गर्ने पनि सहमतिमा उल्लेख छ।

महानगरपालिकाले मागहरु पुरा गर्ने सहमति जनाएपछि ‘ई’ले आफ्नो आन्दोलन स्थगित गर्ने भएका छन्। साना सडक व्यवसायीलाई विकल्पसहित व्यवस्थापन गर्न माग गर्दै उभिएर उनले आन्दोलन गरेका थिए। फुटपाथ व्यवसायीको हक र अधिकारका लागि अभियन्ता ‘ई’ अनवरत १९९ घन्टादेखि काठमाडौं महानगरपालिकाको कार्यालय र राष्ट्रिय सभागृह अगाडि उभिँदै आएका थिए।

सहमतिमा ‘ई’ र महानगरपालिकाका तर्फबाट कार्यपालिका सदस्य चिनीकाजि महर्जन तथा मेयर बालेन्द्र शाहको सचिवालयबाट धिरज जोशीले हस्ताक्षर गरेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

ट्रम्प–पुटिनको भेटपछि स्कोल्जद्वारा युक्रेनका लागि ‘निर्देशित शान्ति’ अस्वीकार

हत्या अभियोगमा फरार दुई जना २० वर्षपछि पक्राउ

फोहोर व्यवस्थापनका विषयमा छलफल गर्न मुख्यसचिवसहितलाई बोलाउन सर्वोच्चको आदेश