काठमाडौं– काठमाडौंमा पहिलोपटक द्रुत बस सेवा सञ्चालनमा आएको छ। संविधान दिवसको अवसर पारेर बुधबार सूर्यविनायक-रत्नपार्क सडक खण्डमा चल्ने द्रुत बस सेवाको उद्घाटन गरिएको छ।
भौतिक पूर्वाधार तथा यातायात मन्त्री प्रकाश ज्वाला, बागमती प्रदेशका यातायातमन्त्री लक्ष्मण लम्साल लगायतले द्रुत बस सेवाको उद्घाट गरे। द्रुत बस सेवाको उद्घाटन बुधबार गरिए पनि यात्रुहरुले भने बिहीबारदेखि मात्रै द्रुत बस चढ्न पाउनेछन्।
1695188147.jpg)
भक्तपुरको सूर्यविनायकदेखि काठमाडौंको रत्नपार्कसम्म द्रुत बसहरु सञ्चालनमा आउनेछन्। यस्ता बसहरु हिँड्न सडकमा छुट्टै लेन समेत बनाइएको छ। अरु सार्वजनिक बसलाई रत्नपार्क-सूर्यविनायक पुग्न डेढ घण्टा समय लाग्ने गरेकोमा द्रुत बस सेवा ४५ मिनेटमै रत्नपार्कबाट सूर्यविनायक पुग्ने बताइएको छ।
माइतीघर, कोटेश्वर, जडीबुटी जस्ता ट्राफिक जाम बढी हुने चोकहरुमा पनि द्रुत सेवाका बसहरु रोकिनु नपर्ने गरी ट्राफिक प्रहरीले सहयोग गर्नेछन्। द्रुत बसको यात्रा छिटो हुने भए पनि भाडा भने अरु सार्वजनिक यातायातकै सरह हुनेछ।
द्रुत सेवाका बसहरुले १९ स्थानमा यात्रु चढाउने तथा ओराल्ने यातायात व्यवस्था विभागले जनाएको छ। द्रुत बस सेवाका लागि रत्नपार्क, भद्रकाली, माइतीघर, बबरमहल, नयाँबानेश्वर, शान्तिनगर, तीनकुने, कोटेश्वर जडीबुटी, लोकन्थली, कौशलटार, गठ्ठाघर, चारदोबाटो लगायत स्थानमा यात्रु चढाउने र ओराल्न मात्रै हुनेछ।
1695188146.jpg)
द्रुत सेवाका बसहरु काठमाडौंको रत्नपार्क र भक्तपुरको सूर्यविनायकबाट ५–५ मिनेटको फरमा छुट्नेछन्। द्रुत सेवाका बसहरु अरु सार्वजनिक बसजस्तो यात्रु कुरेर बस्ने छैनन्।
द्रुत बस सेवाका लागि सडकमा रातो रंगको छुट्टै लेन बनाइएको छ। यो लेनमा दैनिक बिहान ९ बजेदेखि ११ बजेसम्म र अपराह्न ४ बजेदेखि साँझ ६ बजेसम्म द्रुत बस सेवा सञ्चालन हुनेछन्।
यातायात व्यवस्था विभागले द्रुत सेवाका लगि २५ वटा बस व्यवस्थापन गर्ने बताइएको छ।
1695118828.jpg)
सार्वजनिक यातायातलाई ट्रफिक जाममुक्त बनाउने उद्देश्यले संसारका विभिन्न देशमा द्रुत बसहरु सञ्चालन हुँदै आएका छन्। नेपालमा पहिलोपटक सञ्चालनमा ल्याइएको यो सेवाको प्रभावकारी कार्यान्वयनमा भने सर्वसाधार र सरोकारवालाहरुले आशंका व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
