बैतडी– केन्द्र सरकारले देशभर निर्माण गर्ने भनेका १० वटा नमूना शहरमध्ये बैतडीको पाटन पनि एक हो। नमूना शहर निर्माणको तयारी थालिँदा एउटा पुरानो तथ्य बाहिरिएको छ। पाटनमा सरकारी जग्गा नै व्यक्तिका नाममा कायम भएको ‘हिनामिना’को तथ्य बाहिरिएको छ।
पाटन नगर विकास समितिले व्यवस्थापनको जिम्मा पाएका सरकारी जग्गामध्ये केही जग्गा व्यक्तिको रहेको पाइएको हो। सडक क्षेत्र भनेर छुट्याइएको जग्गा समेत व्यक्तिको नाममा रहेको पाइएको छ।
पाटन बजारको शाखा सडकका लागि छुट्याइएको १७१७ नम्बरको कित्ताको जग्गा स्थानीय व्यवसायी गणेश भट्टको नाममा रहेको पाइएको छ। पाटन नगरपालिका–६ मा पर्ने सडक पक्की (प्लास्टर) गर्ने पक्रिया अगाडि बढाउन खोज्दा सडक क्षेत्र भनिएको जग्गा व्यक्तिको नाममा रहेको खुलेको हो।
मालपोत कार्यालय बैतडीको रेकर्डअनुसार उक्त जग्गा स्थानीय व्यवसायी भट्टले २०५३ माघ १४ गते नन्द भट्टबाट नामसारी गरेर लिएको देखिएको छ। मालपोतको विवरणअनुसार २०४७ साल अगाडि नै स्थानीय नन्द भट्टले ३१३ नम्बरको कित्ता आफ्नो नाममा गरेका थिए। त्यही समयमा १७१७ कित्ता नम्बर बनाएर नामसरी गरेको देखिएको छ। सँगै रहेको १७१८ नम्बर कित्तामा सडक निमार्ण भएको छ। उक्त जग्गा भने नगर विकास समितिकै नाममा रहेको छ।
मालपोत कार्यालयबाट पाटन नगरपालिकालाई प्राप्त नक्सामा १७१७ नम्बर कित्ता व्यक्तिको नाममा देखिएको नगरपालिका अमिन जनक चन्दले बताए। उनले भने, ‘सडक हुनुपर्ने जमिन घडेरी भनेर नक्सामा कायम रहेको देखियो। कसरी यस्तो भयो भनेर खोजी भइरहेको छ।’
२०७४ सालमा निर्वाचित नगर प्रमुख तथा नगरविकास समिति अध्यक्ष केशब बहादुर चन्दले ५ वर्षमा केही सामाजीक संस्थाहरुलाई भोकचलनका लागि जग्गा दिने निर्णय गरेका छन्। त्यसबाहेक उनले जग्गासम्बन्धी कुनै निर्णय गरेका छैनन्। अहिले नगर विकास समितिका अध्यक्ष तथा पाटन नगरपालिका प्रमुख रहेका गौरीसिंह रावलले पनि जग्गाको भोकचलनसम्बन्धी केही निर्णय गरेको देखिँदैन।
देशका धेरै ठाउँमा नगर विकास समितिका अध्यक्ष र पदाधिकारीको मिलेमतोमा सरकारी जग्गा व्यक्तिलाई बिक्री गरिएको घटना यसअघि पनि सार्वजनिक हुँदै आएका छन्। पाटनमा पनि त्यसरी नै नगर विकास समितिका अध्यक्ष र पदाधिकारीको मिलेमतोमा सरकारी जग्गा व्यक्तिको नाममा गएको हुनसक्ने स्थानीय जनप्रतिनिधिको आशंका छ।
पाटन नगर विकास समितिका अध्यक्ष समेत रहेका पाटन नगर प्रमुख रावलले नगर विकास समितिका सदस्य जगविर विष्टलाई कागजात संकलन तथा छलफलको जिम्मेवारी तोकेका छन्।
नगर विकास समितिका अध्यक्ष विष्टले अहिले मालपोत र नापी कार्यालयका ढड्डाहरु हेरेर सरकारी जग्गा व्यक्तिको नाममा बनाउने काम कसरी भयो भनेर अध्ययन भइरहेको बताए।
पाटन नगरपालिका–६ का वडाध्यक्ष राजेन्द्र बिष्ट २०४५ सालपछि मात्रै सरकारी जग्गा व्यक्तिको नाममा गएको देखिएको बताउँछन्। ‘कसरी व्यक्तिको नाममा गयो थाहा छैन। तर, २०४५ सालपछि भएको देखिन्छ, खोजी जारी छ,’ उनले भने, ‘हाम्रो वडाको बिषय भएकाले मैले यो सडकको बिषयमा छलफल गरी निकास निकाल्ने प्रयास गरेका छु।’
नमूना शहर निर्माणको कामअन्तर्गत अहिले नयाँ शहर कार्यालय पाटनले बजार क्षेत्रका सहायक सडकहरु पक्की बनाउने काम गरिरहेको छ। व्यक्तिका नाममा गएको सरकारी जग्गामा अहिले सडक बन्नुपर्ने हो। तर, त्यहाँ घरधनीले घर बनाउन थालेका छन्।
दुईतिरबाट सडक जोडिनुपर्नेमा अहिले सडकको बीचमा घर निर्माण भइरहेको हो। जसकारण अहिले सडक निर्माणको काम समेत ठप्प छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
