काठमाडौं- सुन तस्करी प्रकरणमा सहकर्मीलाई पक्राउ गरेको र अनुसन्धानका नाममा अनावश्यक दु:ख दिएको भन्दै त्रिभुवन विमानस्थलका कर्मचारीहरुले आन्दोलन सुरु गरेका छन्।
कर्मचारीहरुलाई पक्राउ गर्ने अनि बयानका लागि भन्दै आफ्ना सहकर्मी बोलाउन थालेपछि विमानस्थल भन्सारका कर्मचारी आन्दोलित भएका हुन्। भदौ २४ गतेदेखि सुरु आन्दोलनका क्रममा कर्मचारीले सोमबार कार्गो जाँचपास बन्द गराएका छन् ।
भेपमार्फत ९ किलो सुन तस्करी र भन्सार जाँचपास भई गएको ६० किलो सुन तस्करी प्रकरणमा विमानस्थलका कर्मचारीको पनि संलग्नता देखिएपछि उनीहरुलाई पक्राउ गरी अनुसन्धान भइरहेको छ।
त्रिभुवन विमानस्थल भन्सार कार्यालयका कर्मचारीका तर्फबाट आइतबार नै जारी गरिएको विज्ञप्तिमा आइतबार उनीहरूले ३ घण्टा पेन डाउन गरेर विरोधको कार्यक्रम तय गरेका थिए। पूर्व निर्धारित विरोधका कार्यक्रम अनुसार भदौ २५ गते सोमबार र भदौ २६ गते मंगलबार उनीहरूले त्रिभुवन विमानस्थल भन्सार कार्यालय अन्तर्गत कार्गो जाँचपास शाखामार्फत हुने निकासी र पैठारीको सम्पूर्ण काम बन्द गर्ने छन्। पूर्व निर्धारित कार्यक्रम अनुसार नै सोमबार कार्गो जाँचपास ठप्प पारिएको कर्मचारीको दाबी छ।
कर्मचारीहरूले विमानस्थलका प्रमुख भन्सार प्रशासकलाई सम्बोधन गरी लेखेको पत्रमा असल नियतले गरेको कामलाई पनि अपराध भन्दै धरपकड गरी हतोत्साहित पार्न खोजिएको दाबी गरेका छन्। भन्सार ऐन, २०६४ को दफा ६६ मा रहेको ‘कुनै भन्सार कर्मचारीले आफ्नो कर्तव्य पालनको सिलसिलामा असल नियतले गरेको कामकारबाहीप्रति निज व्यक्तिगत रूपमा जबाफदेही हुनेछैन’ भनिए पनि सुन प्रकरणमा व्यक्ति विशेषलाई जवाफदेही बनाइएको भन्दै कर्मचारीले आन्दोलन सुरु गरेका हुन्।
कर्तव्य पालनाको क्रममा खटिएका कर्मचारीलाई धरपकड गरी दैनिक प्रशासनिक कार्यलाई नै हतोत्साहित गर्ने काम गरेको उनीहरुको आरोप छ। प्रहरी र अन्य निकायबाट निरन्तर हस्तक्षेप र धरपकड भएको भन्दै उक्त कार्य पूर्ण रुपमा बन्द नभएसम्म कार्यालयको दैनिक कार्यसञ्चालन गर्न असमर्थ रहेको कर्मचारीले विज्ञप्तिमार्फत जानकारी गराएका छन्।
विमानस्थल भन्सारका कर्मचारीले गत भदौ १२ गते गते नै भन्सार विभागका महानिर्देशकलाई सम्बोधन गरी सामुहिक सरुवाका लागि आग्रह पनि गरेका थिए। तर कसैको पनि सरुवा भएन।
राजस्व असुलीको असल नियतले भन्सार ऐन, नियम तथा अन्य प्रचलित कानुनबमोजिम गरिएको नियमित कार्यलाई अनुसन्धानको नाममा निर्दोष कर्मचारीहरूलाई धरपकड गर्ने र पक्राउ गरी हिरासतमा लिने लगायतका कार्य अबिलम्व बन्द गर्नुपर्ने माग विज्ञप्तिमा गरेका छन्।
कर्मचारीहरू गिरफ्तार गरी हिरासतमा राख्दा के–कति कारणले गिरफ्तार गरेको हो सो विषय कर्मचारी कार्यरत कार्यालयलाई समेत जानकारी नदिएको भन्दै अमानवीय तरिकाले गिरफ्तार गरी राख्ने कार्य अबिलम्व बन्द हुनुपर्ने र बिना प्रमाण थुनामा राखिएका सबैलाई रिहा गर्नुपर्ने उनीहरुको माग छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
