काठमाडौं– आफ्नै घरमा मृत भेटिएका अभिनेता सारुक ताम्राकारकी आमाले प्रहरी प्रशासनलाई छानबिनका लागि आग्रह गरेकी छन्।
सोमबार सारुककी आमा रुकमिणी ताम्राकारले छोराको आत्महत्या प्रकरणबारे छानबिन गर्न प्रहरी प्रशासनलाई अनुरोध गरेकी हुन्।
उनले सामाजिक सञ्जालमा लेख्दै छोरा गुमाएको ५२ दिनमा श्रीमान् गुमाउँदा आफूमाथि ठूलो बज्रपात परेको बताएकी छन्।
यतिका दिनसम्म पनि प्रहरी प्रशासनबाट छानबिन कहाँसम्म पुग्यो भन्ने जानकारी नआएको भन्दै असन्तुष्टिसमेत पोखेकी छन्।
उनले आफ्नो छोराको अन्तिम शुटिङका बेला के भएको थियो र सारुकले त्यस्तो कदम किन लिए भन्ने कुराको राम्रोसँग छानबिन गरी जानकारी दिन अनुरोध गरेकी छन्। साथै फोनको कल डिटेलसमेत अगाडि ल्याउन प्रहरीलाई उनले अनुरोध गरेकी छन्।
उनले भनेकी छन्, ‘मेरो छोरा गुमाउनुको साथै ५२ दिनमा मेरो श्रीमान पनि गु्माउँदा म माथि ठूलो बज्रपात परेको छ। यतिका दिनसम्म पनि पुलिस प्रशासनबाट छानबिन कहाँसम्म पुग्यो भन्ने कुराको खबर नआउँदा म सम्पूर्ण पुलिस प्रशासनलाघ अनुरोध गर्दछु कि छोराको अन्तिम शुटिङका बेला के भएको थियो र मेरो छोराले यो कदम कसरी लियो भन्ने कुराको छानबिन राम्रोसँग गरियोस। र पुलिसले फोन डिटेल प्रष्ट अगाडि ल्याउन हुन अनुरोध गर्दछु।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।