पाेखरा–१८ औं एसियाडमा भाग लिएर आएको प्याराग्लाइडिङ टिमलाई मंगलबार पोखरामा पश्चिमाञ्चल क्षेत्रीय तथा जिल्ला खेलकुद विकास समिति लगायत विभिन्न संघसंस्थाले स्वागत तथा सम्मान गरेको छन्।
उनीहरूलाई नेपाल हवाई खेलकुद संस्था, प्याराग्लाइडिङ पाइलट खेलकुद क्लब, नेपाल प्याराग्लाइडिङ एन्ड ग्लाइडिङ एसोसिएसन, राष्ट्रिय तथा अन्तर्राष्ट्रिय खेलाडी संघ, खेलकुद पत्रकार मञ्च आदि संघसंस्थाले सम्मान गरका हुन्।सम्मान कार्यक्रममा युवा तथा खेलकुद मन्त्री जगतबहादुर विश्वकर्माले पहिलेभन्दा अहिलेको बजेटले खेलकुदलाई प्राथमिकतामा राखेको दाबी गरे।
‘अहिलेको बजेटले अन्र्तराष्ट्रिय खेलमा स्वर्ण पदक जित्ने खेलाडीलाई आजीवन मासिक ५ हजार र ओलम्पिकमा भाग लिने खेलाडीलाई आजीवन मासिक ३ हजार दिने व्यवस्था गरेको छ,’ उनले भने, ‘प्रत्येक खेलाडीको जीवन बिमा गर्ने सुविधा पनि अहिलेको बजेटले ल्याएको छ।’
मन्त्री विश्वकर्माले प्रत्येक खेलाडीको मनोबल बढाउन आफू प्रतिबद्ध रहेको बताए। उनले भने, ‘सरकार खेलाडीका लागि पायक पर्ने न्यूनतम वातावरण निर्माण गर्न लागि परिरहेको छ।’ उनले सरकारले लगानी गरे त्यसको प्रतिफल पाइने हुनाले खेलकुदमा लगानी बढाइरहेको सुनाए।मन्त्री विश्वकर्माले पोखरालाई एडभेन्चर र हाइअल्टिट्युड खेलका रुपमा चिनाउन चाहेको बताए।
‘पोखरालाई खेलकुद हबको रुपमा चिनाउन सरकारले गृहकार्य गरिरहेको छ। यसका लागि गण्डकी प्रदेशले आवश्यक कदम चाल्नुपर्छ।’ राष्ट्रिय खेलकुद परिषदका सदस्य सचिव केशवकुमार विष्टले पोखरा पहिले प्राकृतिक सुन्दरताले चिनिएको र अहिले खेलाडीले चिनिएको बताए।
प्याराग्लाइडिङ समूहका प्रशिक्षक योगेश भट्टराईले सरकारले प्याराग्लाइडिङमा मात्रै नभएर सबै खेलमा आवश्यक लगानी गर्न नसकेको बताए। ‘लगानी धेरै भए खेलाडीले अझै राम्रो गर्न सक्छन् भन्ने लाग्छ,’ उनले भने। पुरुष टिमका क्याप्टेन योगेश भट्टराईले इन्डोनेसियाको मौसम प्रतिकुल भएपनि आफूहरूले सक्दो राम्रो गरेका सुनाए।
उनले इन्डोनेसियामा भएको प्रतियोगिताले धेरै कुरा सिकाएका पनि बताए।
एसियाडमा भाग लिएर आएको नेपाली टिमलाई नगर परिक्रमापछि मदन भण्डारी स्पोर्टस् एकेडेमी र राष्ट्रिय खेलकुद परिषदका पूर्वसदस्य राजेश गुरुङले प्रत्येक प्याराग्लाइडरलाई १० हजार रुपैयाँ, भूपू–खेलाडी मञ्च कास्कीले ५० हजार नगदले सम्मान गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
