काठमाडौं– प्रधानमन्त्री पुष्पकमल दाहाल प्रचण्डले कृषिमा भएको लगानी अनुसारको प्रतिफल नआएकोमा आफू पनि सन्तुष्ट नभएको बताएका छन्। मंगलबार प्रतिनिधि सभा बैठकमा सांसदहरुसँगको प्रत्यक्ष प्रश्नोत्तरका क्रममा प्रधानमन्त्री प्रचण्डले कृषि क्षोत्रमा गुणत्मक, आधुनिकरण र व्यवसायीकरणलाई सरकारले जोड दिएको उनले बताए। उत्पादन र उत्पादकत्वमा केही वृद्धि भएको भन्दै अपेक्षाकृत वृद्धी हुन नसकेको उनले बताए।
‘प्रधानमन्त्री कृषि परियोजना प्रदेशबाट परिचालन गर्ने नीति लिइएको छ। रासायनिक मल समयमै उपलब्ध हुने काम सरकारले गरेको छ। कृषि उपजको बजारका लागि विभिन्न कार्यक्रम भइरहेको छ,’ प्रधानमन्त्रीले भने, ‘पशु नश्ल सुधारका कार्यक्रम पनि सञ्चालन भएको छ। बाँझो जमिनलाई पनि उपभोग गर्ने विषयमा सरकारले नीति ल्याएको छ।’
प्रधानमन्त्री प्रचण्डले कृषि क्षेत्रका विषयमा अन्य देशसँग पनि सहकार्य गर्ने गृहकार्य भइरहेको जानकारी दिए।
छिट्टै हुने आफ्नो चीन भ्रमणका क्रममा पनि कृषि क्षेत्रमा सहकार्य गर्ने प्रस्ताव राख्ने उनले जानकारी दिए। आफ्नो भारत भ्रमणका क्रममा पनि समकक्षी नरेन्द्र मोदीसँग कृषि सहकार्यका विषयमा कुराकानी गरेको उनले बताए।
भारत भ्रमणमा रहँदा आफूले कृषिमा सहकार्य गर्ने विषयमा कुरा पनि गरेको र अब छिटै सहकार्य पनि हुने उनले बताए। उनले नयाँ प्रविधिका साथ भारतसँग सहकार्य गर्ने कुरा २ देशका प्रधानमन्त्रीबीच भएको र यसले कृषि उत्पादनमा सहकार्य गर्ने बाटो सुरु भएको प्रधानमन्त्री प्रचण्डले दाबी गरे। उनले चीन भ्रमणको क्रममा पनि आफूले उक्त कुरा उठाउने बताए।
कृषि बिमा र बिमा प्रिमियम पनि लागू गरेको भन्दै उनले कृषि पेसालाई सम्मान गर्ने काम पनि गरेको दाबी गरे।
मंगलबारको प्रतिनिधि सभा बैठकमा सांसद उर्मिला माझीले कृषि क्षेत्रका समस्या र सरकारले गरेका काम कामबारे प्रधानमन्त्रीलाई प्रश्न गरेकी थिइन्। ‘नेपाल कृषिप्रधान देश हो। ६५ प्रतिशत कृषिमै आस्रित छ। तर पछिल्लो समय भान्साका सबै कुरामा आयातमा भर पर्नेुपर्ने भएको छ। कृषिमा लगानी धेरै, तर उत्पादन बढेको छैन। सरकारले कृषिलाई गर्विलो पेसा बनाउने के गर्दैछ?’ सांसद माझीको प्रश्न थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
