धनगढी- कैलालीको धनगढी उपमहानगरपालिका-४ मा रहेकाे दक्षिणकाली हाटबजारमा उपमहानगरपालिकाले एक्कासी डोजर चलाएको छ।
शुक्रबार दिउँसो त्यहाँ व्यापार गरिरहेका व्यवसायीहरूलाई जानकारी नै नदिई उपमहानगरपालिकाले डोजर चलाएको हो।
सोही हाटबजारमा तरकारी पसल गरिरहेका यमराज रावलले भने, ‘हामीलाई यहाँ व्यापार नगर अन्यत्र सर भनेको भए आफै व्यवस्थापन गर्थे तर, अहिले एक्कासी डोजर लगाउँदा पसलमा क्षति पुगेको छ। मेरो पसलमा रहेको आलुमा क्षति पुगेको छ।’ उनले पसलमा डोजर चलेपछि त्यहाँ भएका सामान एक्कासी कहाँ व्यवस्थापन गर्ने भन्ने समस्या रहेको बताए।
हाट बजारभित्र बनेका पक्की गोदामभित्र तरकारी, फलफूलका होलसेल पसलहरू छन्। सडक किनारमा रहेका केही कोठाहरूमा किराना, चिया पसलका साथै मासु सेन्टर थियो। भूपू सैनिक सहकारी संस्थाले सम्झौता गरी त्यहाँ विभिन्न व्यापारीहरूलाई व्यवसाय सञ्चालन गर्न अनुमति दिएको थियो। सहकारीका अध्यक्ष शंकर सिंह ऐरीले भने, ‘यहाँका सडकबाट आइरहेका भाडा हामीले सम्झौता गरेको ठेकेदारलाई मासिक रुपमा बुझाउँदै आइरहेका छौं। हामीसँग अझै एक वर्षसम्मको सम्झौता बाँकी छ। तर, उपमहानगरपालिकाले एक्कासी यहाँ डोजर चलाएको छ। हामीलाई जानकारी पनि छैन।’
उनले उपमहानगरपालिकासँग सटरका विषयमा पटक–पटक संवाद भएको बताए। भने, ‘हामीले सम्झौता गरेको मानिसलाई सटरबाट आएको भाडा बुझाउने हो तर, उपमहानगरपालिकाले सिधै आफ्नो खातामा आउनुपर्ने भनेर दबाब दिइरहेको थियो।’ एक सय २५ सेयर सदस्य रहेको सो सहकारीले ठेक्का सम्झौता गरेका ठेकेदारसँग साढे ४ लाख धरौटी जम्मा रहेको उनको भनाइ छ।
यता उपमहानगरपालिकाले सो हाटबजार आफनो मातहातमा आइसकेकाले त्यहाँ भएका सम्पूर्ण व्यवसाय हटाउन डोजर चलाएको बताएकाे छ।
‘हाट बजार पहिला ओम पाठकले ठेक्का सम्झौता गरेर चलाएका थिए। गत पुसमा सम्झौता मिति सकिएपछि छ महिनाभित्र खाली गर्न भनि पत्राचार पनि गरिसकेका थियौँ। त्यो बेला त्यहाँ किसानका कोल्ड स्टोर पनि भएकाले हामीले साउनदेखिको भाडा उपमहानगरपालिकालाई दिन भनेका थियौँ। तर, त्यो भाडा आएन’ राजश्व शाखा प्रमुख योगेन्द्रप्रसाद चन्दले भने।
उनले हट्न भनेर उपमहानगरपालिकाले भनेकाे तर नहटेपछि डाेजर चलाएकाे बताए। उनले भने, ‘भाडा पनि नदिने हट्न पनि नमानेपछि डोजर चलाएका हौं।’ उपमहानगरपालिकाले त्यहाँको हाटबजार हटाएर सपिङ कम्पलेक्स बनाउने योजना बनाएको छ। उनले भने, ‘सपिङ कम्पलेक्सका लागि विस्तृत परियोजना प्रतिवेदन (डीपीआर) तयार भइरहेको छ।’
वर्षातको मौसममै व्यवसायी गरिरहेको स्थानमा उपमहानगरपालिकाले डोजर चलाएपछि त्यहाँका व्यवसायीहरू अभरमा परेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
